A Facultade de Ciencias Sociais e da Comunicación acolle, entre o martes 19 e o xoves 21, a Érték Conference, unha serie de conferencias e talleres promovidas por un grupo de estudantes da facultade. Dirixidas a completar a formación do alumnado das diferentes titulacións da facultade en ámbitos como o markéting e a comunicación, a Érték Conference, que conta co patrocinio da facultade, reúne no seu programa 13 conferencias e talleres, que se verán complementadas á súa vez pola habilitación dunha zona chill out, dirixida a amenizar os descansos e conferencias con actuacións de diferentes estudantes. 

O evento ábrese este martes ás 10.30 horas coa presentación das xornadas, sucedida por unha conferencia de Jorge Calvo, director estratéxico e creativo da axencia The Rubik. Así mesmo, no programa destas xornadas figuran tamén os relatorios de Gael García, xefe de márketing do Real Club Celta, ou Pati Blanco, director de Comunicación, Relacións Internacionais e Márketing de El Corte Inglés, xunto con conferencias sobre emprendemento, comunicación política, comercio electrónico ou un taller sobre Motion Graphics.