A Sala Alterarte do campus de Ourense acolle a mostra Formas e tránsitos, da creadora Isabel Flores e curada por Sara Donoso. Nela, a artista propón ao público "unha viaxe intimista de elementos que se bifurcan e interfiren, onde a imaxe do azulexo da antiga casa familiar convive coa simplificación doutro motivo visto en Turquía". Isabel Flores compaxina nesta exposición "a intervención sobre muro coa disposición de varios panos serigrafiados en gasa que discorren lixeiros suspendidos do teito" e que obrigan a establecer un percorrido non lineal onde o corpo do espectador ou espectadora se activa como suxeito actuante.