A exposición Manuel Moldes. Vieiros na memoria que permanecerá aberta na sala de exposicións da Casa Galega da Cultura do 11 de marzo ao 24 de abril. Esta mostra ten a súa orixe na Facultade de Belas Artes de Pontevedra, onde se realizou con motivo do cambio de nome da súa sala expositiva, antiga Sala X, a sala universitaria Profesor Manuel Moldes. A exposición sopórtase en dúas cuestións principais. Por unha banda, revélase o interese de Manuel Moldes polo debuxo, polo grafismo, non só como disciplina autónoma, senón tamén aplicado á pintura. Esta base sostén a deriva cara á segunda cuestión: o xesto primixenio que ten na liña e nas súas contorsións o xerme da súa práctica e que en Vieiros na memoria se pon de relevo a través dunha selección de obras vinculadas desde a maraña e o impetuoso.