A Sala Universitaria Profesor Manuel Moldes acolle a inauguración da exposición A memoria do son, que reúne fondos instrumentais e do arquivo do Centro de Artesanía e Deseño (Centrad) da Deputación de Lugo. Xunto a outros materiais, esta mostra itinerante reúne unha serie de reproducións de instrumentos medievais, construídos a partir das súas representacións históricas no Pórtico da Gloria ou no Pazo de Xelmírez. Os fondos documentais complétanse así mesmo con melodías accesibles a través de códigos QR, que permiten coñecer o son dos instrumentos expostos, xunto con propostas interactivas, como un salterio no que as persoas visitantes poderán tocar melodías das cantigas de Alfonso X e Martín Códax.

A exposición poderá visitarse no espazo expositivo do campus ata o 27 de xaneiro, de luns a xoves en horario de 9.00 a 14.00 horas.