A Biblioteca Rosalía de Castro do campus de Ourense acolle a exposición Sen Moldes II, que reúne 19 fotografías nas que alumnado da Facultade de Belas Artes de Pontevedra reflexiona sobre os roles de xénero, a violencia machista e a orde sexual imposta. Patrocinada pola Unidade de Igualdade da Universidade de Vigo, a mostra está conformada por unha selección dos proxectos desenvolvidos no marco dun exercicio da materia Técnicas fotográficas, que imparten os docentes Mar Caldas, Andrés Pinal e Carlos Tejo.