Pontevedra súmase á segunda edición da Noite Galega das Persoas Investigadoras (G-Night) co evento Ciencia no bar. Con entrada libre ata completar capacidade, trátase dunha serie de charlas de divulgación científica, presentadas pola directora de área do Campus de Especialización Crea, Ana Belén Fernández Souto. Neste encontro participan o investigador do Grupo de Tecnoloxía Enerxética Juan Jesús Rico, cun relatorio titulado A combustión: moito máis que lume e gases, e José Carlos López Ardao, do centro de investigación atlanTTic, cun faladoiro titulado A intelixencia artificial que nos rodea. 

Coordinada pola UVigo, que lidera un consorcio formado por unha decena de socios, entre os que se atopan as universidades de Santiago de Compostela e A Coruña e organismos de investigación galegos, a G-Night 2022 despregará na segunda segunda edición, o vindeiro venres, 30 de setembro, máis de 70 actividades de divulgación, lecer e entretemento científico, nunha trintena de localizacións, espalladas polas sete principais cidades galegas: Vigo, Ourense, Pontevedra, Santiago, A Coruña, Ferrol e Lugo.