Asisten: Jorge Soto, vicerreitor do campus de Pontevedra; Xosé Baamonde, decano da Facultade de Ciencias Sociais e da Comunicación, e Beatriz Legerén, presidenta do comité organizador

Preto de 20 especialistas e profesionais vinculados á industria do videoxogo tomarán parte os días 25 e 26 de outubro na Facultade de Ciencias Sociais e da Comunicación na I Conferencia Internacional de Videoxogos e Publicidade, organizada polo grupo de investigación Comunicación Persuasiva 2, o grupo de innovación docente ComTecArt e a asociación científica Icono 14, co patrocinio da Universidade de Vigo, a Vicerreitoría do campus e o Consello Social da Universidade.

Abordar o poder comunicativo e persuasivo dos videoxogos é o eixo central dun foro que reúne a expertos e expertas de diferentes universidades españolas e portuguesas xunto con axentes da industria e que se estrutura en seis mesas temáticas, precedidas da conferencia de apertura que impartirá o catedrático da Universidad Complutense de Madrid Francisco García.