A xornada Control de xestión desde unha perspectiva de xénero celebra a súa segunda edición de xeito on-line, adaptándose ás medidas de loita contra a covid-19, e abríndose á participación de alumnado de arredor de doce universidades españolas e iberoamericanas. A cita terá lugar o mércores 28 de outubro organizada nesta ocasión pola Universidade de Vigo e AICOGestión, asociación de carácter non lucrativo que persigue a promoción e difusión do coñecemento científico e profesional na área da contabilidade e o control de xestión e que pretende ser referente no seu eido de actuación en España, Portugal e América. Coordinada polo profesor da Facultade de Ciencias Empresariais e Turismo Ernesto López-Valeiras, a actividade conta ademais co patrocinio de Ecobas e a Unidade de Igualdade da UVigo.