A sexta edición do Pont-Up Store, o evento dedicado ao emprendemento que a Universidade de Vigo promove no marco do Campus Crea, co Concello de Pontevedra como patrocinador principal, acolle diferentes actividades na xornada previa á apertura, o venres 20, do seu espazo central na praza de España.

Nesta xornada porase en marcha o Espazo de Economía Social e Creativa do evento coa celebración, na sede de Afundación, da xornada As cooperativas culturais: resposta aos retos do sector cultural. Así mesmo, tamén continuará desenvolvéndose, na Sala X da Facultade de Belas Artes, o Laboratorio Creativo, mentres que a sede da Vicerreitoría do campus acollerá a primeira das actividades do Espazo Gaming deste evento, unha charla técnica sobre creación de personaxes.