Asisten: Manuel Reigosa, reitor da Universidade de Vigo; Susana López Abella, secretaria xeral de Igualdade da Xunta de Galicia, e Águeda Gómez, directora da Unidade de Igualdade da Universidade de Vigo

A Facultade de Ciencias Sociais e da Comunicación acolle as xornadas Comunicación, igualdade e violencia contra as mulleres, dirixidas a dar a coñecer a importancia do audiovisual e dos medios de comunicación nos procesos de socialización e transmisión de valores, analizar as dinámicas a través das que se constrúe o sexismo e pór sobre a mesa respostas profesionais que contribúan a garantir a protección dos dereitos das mulleres.

Organizada pola Unidade de Igualdade da Universidade e a organización Enclave Feminista e financiadas pola Secretaría Xeral de Igualdade da Xunta no marco do Pacto de Estado contra a violencia de xénero, estas xornadas reúnen diferentes especialistas e profesionais do xornalismo e o audiovisual. Entre as e os conferenciantes figuran a escritora e crítica de cine e televisión Pilar Aguilar; o xornalista e escritor José María Calleja; a xornalista e responsable do Observatorio de la Imagen de las Mujeres, María Jesús Ortiz, ou a ex-secretaria de Estado de Igualdade Laura Seara.