120 especialistas de 20 países participarán en Ourense nun encontro de referencia internacional sobre patóxenos da pataca

A Facultade de Ciencias do campus de Ourense acollerá do 18 ao 21 de maio a celebración do 21st EuroBlight Workshop, un dos encontros científicos máis relevantes de Europa no ámbito da sanidade vexetal e da produción sostible da pataca. Nel participarán 120 investigadoras e investigadores de 20 países e de 58 centros de investigación e empresas tecnolóxicas. A elección da Universidade de Vigo como sede desta edición, comentan desde a organización, “sitúa o campus de Ourense no mapa europeo da investigación agraria e medio ambiental”.

O encontro en Ourense está promovido polo Grupo de Investigación en Sistemas Agroambientais (GISA) da UVigo, sendo as súas responsables M. Carmen Seijo e Laura Meno, e enmárcase na liña de investigación deste grupo en patóxenos de cultivos como a pataca. Ademais, conta co apoio da Vicerreitoría do campus de Ourense e do Campus Auga, o proxecto de especialización do campus ourensán acreditado pola Xunta de Galicia, e a Deputación de Ourense-Inorde. Segundo explican, a rede EuroBlight reúne periodicamente universidades, centros tecnolóxicos, empresas, administracións públicas, persoal investigador e profesionais do sector agrario para abordar un dos grandes desafíos da agricultura europea: o control do mildio e da alternariose da pataca (Phytophthora infestans e Alternaria), “que cada ano ameazan a produtividade e a sostibilidade deste cultivo estratéxico”.

Segundo sinalan desde o comité organizador, a produción de pataca en Europa afronta actualmente novas dificultades derivadas da aparición de cepas máis agresivas dos patóxenos, algunhas con menor sensibilidade a funxicidas clave e outras capaces de superar resistencias xenéticas presentes en variedades comerciais. A isto súmanse os cambios lexislativos e ambientais que afectan ao uso de produtos fitosanitarios, así como maior demanda dos consumidores e consumidoras de alimentos máis sostibles e respectuosos. Neste contexto, a rede EuroBlight impulsa a cooperación científica internacional para deseñar, probar e avaliar solucións innovadoras que permitan un control máis sostible, eficaz e resiliente do mildio e da alternaria en toda Europa. No marco deste reto, organiza bianualmente o encontro que terá lugar en Ourense e que anteriormente se celebrou en cidades como Lunteren (2024), Ascona (2022), York (2019) e Aarhus (2017). 

Intercambio de datos e colaboración  

Durante catro días, o evento en Ourense reunirá especialistas de distintos países, entre eles todos os referentes na temática da cita, para compartir resultados científicos, ferramentas dixitais, estratexias de manexo integrado e novas liñas de colaboración. Entre os principais temas da cita están como xestionar o mildio con acceso limitado a funxicidas tradicionais; as estratexias para previr resistencias a funxicidas e uso de produtos alternativos; e a aplicación do coñecemento sobre a planta hospedadora, o patóxeno e as súas interaccións para mellorar estratexias de control e sistemas de axuda á decisión. Tamén se falará da integración de modelos locais de predición con información de hóspede e patóxeno a escala de paisaxe; a colaboración global para comprender, innovar e limitar a dispersión de enfermidades e a ciencia, innovación e cooperación europea. O encontro porá especial énfase no intercambio de datos, a ciencia colaborativa e a creación de infraestruturas comúns para responder a ameazas fitosanitarias cada vez máis complexas.