150 persoas mergúllanse na investigación mariña do CIM

A ciencia mariña de vangarda que desenvolven os grupos Centro de Investigación Mariña traspasou esta fin de semana as portas dos laboratorios para proxectarse á sociedade e dar a coñecer os diferentes eidos do coñecemento nos que traballan. Esta fin de semana 150 persoas participaron nas actividades deseñadas dentro do programa Divulgando Ciencia Singular, unha proposta na que participan os cinco centros de investigación do campus de Vigo entre os meses de outubro e novembro. O CIM foi o máis madrugador e deseñou unha serie de actividades tanto no campus, como na Ecimat e na propia ría de Vigo que tiveron o venres e o sábado.

Actividades en catro localizacións

Como referente na xeración, transferencia e divulgación do coñecemento sobre o ecosistema mariño e costeiro e o coñecemento azul, o CIM apostou por un programa de actividades que permitise amosar todo o seu potencial investigador. Así, o venres tiveron lugar unha serie de visitas guiadas no campus, en concreto ás instalacións dos grupos de investigación do CIM no edificio de Ciencias Experimentais e no edificio Olimpia Valencia. 

O sábado as actividades trasladáronse á Estación de Ciencias Mariñas de Toralla e á propia ría, xa que as persoas inscritas saíron do peirao de A Laxe nun barco que os deixou na Ecimat, a principal infraestrutura de investigación do CIM. Durante tres horas puideron gozar da combinación de diferentes experiencias, dende o traxecto no barco-aula no que aprenderon cuestións interesantes sobre a ría de Vigo e descubriron o funcionamento dun robot subacuático ata a visita aos laboratorios, salas de cultivos, etc.

As prazas, esgotadas en dous días

Dende a organización valoran moi positivamente a resposta da cidadanía a este convite para coñecer a investigación mariña que se desenvolve na UVigo e, de feito, as prazas ofertadas, “enchéronse en apenas dous días, o que dá unha idea do interese da xente por este tipo de propostas divulgativas”. Todas as actividades tiveron unha grande acollida, destacan dende o CIM, “e unha gran resposta por parte da xente, que participou de xeito moi activo nas visitas, interesándose moito polo que se está a realizar no CIM” e, de feito, moitas das persoas participantes xa tiñan asistido a edicións anteriores deste tipo de propostas divulgativas. 

Agora queda por diante unha nova cita, o día 29, pero desta volta no campus de Ourense, para coñecer o grupo de investigación EPhysLab, pertencente ao CIM. A visita terá lugar entre as 12.00 e as 12.40 horas e a inscrición está aberta. 

A seguinte cita de Divulgando Ciencia Singular, este xoves no Cintecx

O programa Divulgando Ciencia Singular continúa este xoves coa xornada de portas abertas do Cintecx, que recibirá a partir das 16.00 horas ao alumnado do Bacharelato STEM do colexio Compañía de María de Vigo, para o que deseñaron un programa de actividades que comprende tres obradoiros sobre combustión, intelixencia artificial e desenvolvemento sostible e biotecnoloxía.

Nas próximas semanas uniranse a estas xornadas divulgativas o resto dos centros de I+D do campus de Vigo. Así, o Centro de Investigación Biomédica deseñou o ciclo Ciencia con C de Cinbio, que consistirá na realización de diferentes actividades que se artellan arredor de tres bloques temáticos: Cinbio na escola (2 de novembro), Cinbio na rúa (4 e 9 en Ourense e Vigo, respectivamente) e Coñece o Cinbio (11, 13 e 19 de novembro).

Pola súa banda, o Centro de Investigación e Tecnoloxías de Telecomunicación, atlanTTic, abrirá as súas portas ao publico xeral a finais do mes de novembro con visitas guiadas as súas instalacións, obradoiros e demostracións prácticas. Finalmente, o centro interuniversitario Ecobas xa desenvolveu varias actividades de proxección, que se completan mañá martes coa presentación dos resultados do proxecto SAVES.