Do 29 de marzo ao 6 de abril, Português Perto

Do 29 de marzo ao 6 de abril, a cultura lusófona volverá a ter un protagonismo destacado na programación do campus de Ourense coa celebración dunha nova edición, a novena, de Português Perto. Aquelas nossas músicas. A través da música, do baile, da historia e da lingua, a comunidade universitaria e a cidadanía en xeral está convidada a achegarse á riqueza cultural dos países lusófonos.

Catro días de programación

A programación, organizada pola Vicerreitoría do Campus de Ourense coa colaboración da Pró-Academia Galega da Língua Portuguesa, a Associaçom Galega da Língua Agal e a Asociación Cultural Algaravía, arrancará o 29 de marzo coa celebración na sala Emilia Pardo Bazán do campus dunha sesión da festa tradicional itinerante Venrespirar, organizada pola Asociación Cultural Algaravía. A actividade, que terá lugar na Sala Emilia Pardo Bazán, iniciarase ás 20.00 h cun obradoiro de danzas tradicionais portuguesas ofrecido por Ana Silvestre, continuará cun concerto de AnaMarSe Trio e Amoras Maduras e rematará cunha foliada aberta.

O día 1 de abril a actividade retomarase coa colaboración de Agal na Facultade de Ciencias Empresariais e Turismo do campus coa celebración dunha nova edición do obradoiro OPS!, que nesta ocasión leva por título O Português Simples. Seguindo o modelo dos obradoiros celebrados nas anteriores edicións, a sesión, que será impartida pola psicóloga e profesora Graciela Lois, terá un carácter principalmente práctico co obxectivo de que as e os asistentes sexan conscientes das portas que lles abre o galego no mundo, non só desde un punto de vista de enriquecemento cultural senón de desenvolvemento profesional.

A música será o protagonista da programación do día 4 de abril, cando se celebre tamén na sala Emilia Pardo Bazán do campus de Ourense un concerto de hip hop a cargo dos galegos García MC e Dj Mil e de Pegkagboom, Umano e Dj Kosn, procedentes da República Democrática de São Tomé e Príncipe. Por último, a novena edición de Português Perto pecharase o día 6 de abril cun roteiro que partirá ás 10.00 h da Praza Maior e que baixo o nome de Áuria Sueva levará ás e aos participantes a visitar ao longo de todo o día diversos espazos relacionados co pasado suevo tanto en Ourense cidade como en concellos próximos.