Este xoves celebrou a súa graduación o alumnado de Traballo Social
42 novos egresados e egresadas para traballar por unha sociedade mellor
Trátase da sexta promoción deste grao
Na xeira de actos de graduación que estas semanas se sucenden no campus de Ourense este xoves foi a quenda do alumnado de último curso do Grao en Traballo Social, da Facultade de Ciencias da Educación. A sexta promoción destes estudos, formada por 42 estudantes, celebrou acompañada de membros da comunidade universitaria e familiares o remate con éxito da súa formación superior e o inicio dunha nova etapa profesional e persoal.
O acto contou coa participación entre outras autoridades académicas de Miguel Ángel Michinel, secretario xeral da Universidade de Vigo, e Mar García, decana da Facultade de Ciencias da Educación, sendo o padriño de promoción o profesor do centro Francisco Javier Aguiar. Para os novos egresados e egresadas da Universidade de Vigo, Mar García tivo palabras de recoñecemento e ánimo para o futuro. “Este acto simboliza o final dunha etapa pero tamén o inicio doutra que debe estar sempre envolta pola ética. Non deixedes de loitar por conseguir esa sociedade que todos e todas desexamos, na que predomine a tolerancia, a solidariedade, a cooperación e a igualdade de oportunidades”, recalcoulle a decana á nova promoción de Traballo Social.