Alumnado de Aeronáutica coñece os grandes avances en telescopios espaciais da man da astrofísica Begoña Vila

Este mércores a astrofísica viguesa Begoña Vila, enxeñeira principal de Sistemas no Centro Espacial Goddard da NASA, foi investida no campus de Ourense como a 31ª doutora honoris causa da Universidade de Vigo en recoñecemento á súa contribución á exploración do universo. Aproveitando a súa estadía en Ourense, este xoves ofreceu ao alumnado da Escola de Enxeñaría Aeronáutica e do Espazo e ás persoas interesadas a conferencia Observando o Universo con telescopios espaciais. Nela falou en detalle dos telescopios James Webb e Nancy Grace e das súas achegas ao coñecemento do espazo.    

En 2006, Begoña Vila incorporouse ao proxecto do Telescopio Espacial James Webb da NASA, contratada pola Axencia Espacial Canadense e en 2013 pasou a ser contratada directamente pola NASA, converténdose en enxeñeira principal de Sistemas no Centro Espacial Goddard, encargada de dous dos instrumentos do citado telescopio. Foi ademais a directora encargada da proba crioxénica final de todos os instrumentos deste telescopio en Goddard. O telescopio James Webb engloba a máis dun millar de persoas e manexa un orzamento por riba dos 9500 millóns de euros, sendo o máis grande e máis complexo dos lanzados ata o momento. 

Actualmente, Begoña Vila está traballando tamén no Telescopio Espacial Nancy Grace Roman, un futuro observatorio espacial infravermello considerado polo Comité Decadal Survey do Consello Nacional de Investigación dos Estados Unidos como a máxima prioridade para a próxima década da astronomía. No proxecto está a coordinar a proba crioxénica do observatorio e apoiando o desenvolvemento das operacións de guía. A previsión é que sexa lanzado a finais de 2026. 

Antes da conferencia, a nova doutora honoris causa da Universidade de Vigo amosou a súa satisfacción por ofrecer esta conferencia ao alumnado da Escola de Enxeñaría Aeronáutica e do Espazo do campus de Ourense. Neste senso, salientou que “sempre me gusta inspirar a rapaces e rapazas para que persigan aquelo que lles gusta” e animounos a seguir os seus soños profesionais. “Agardo atopar a algún destes alumnos ou alumnas traballando comigo algún día”, dixo a astrofísica galega. Cando se fala dos grandes telescopios espaciais, apuntou, a xente soe pensar en primeira instancia que para traballar neles hai que ser astrofísico e astronauta, pero en realidade, sinalou, precísase un amplo abano de profesionais, desde os que traballan en software e óptica ata electrónica e mecánica.