Alumnado do campus fórmase para transformar as súas ideas en emprendementos

O campus de Ourense acolle este mes de novembro a celebración dunha Formación para a innovación: o emprendemento do alumnado universitario. A actividade está coordinada por Javier Rodeiro e María Montserrat Cruz, profesorado da Escola Superior de Enxeñaría Informática, e busca dar ás ao espírito emprendedor do estudantado. A iniciativa conta co apoio e financiamento do Campus Auga, o proxecto de especialización do campus de Ourense acreditado e financiado pola Xunta de Galicia. 

As xornadas, de balde, están recoñecidas cun crédito ECTS, ademais de diploma acreditativo, e celébranse en horario de tarde no edificio Campus Auga os días 5, 12, 19 e 25 de novembro. Están inscritos 17 alumnas e alumnos, a maior parte da Escola Superior de Enxeñaría Informática pero tamén do Grao de Turismo (Facultade de Ciencias Empresariais e Turismo) e do Grao de Ciencia e Tecnoloxía dos Alimentos (Facultade de Ciencias). “O noso obxectivo é formar ao alumnado nun tema pendente como é o emprendemento empresarial”, explican desde a organización da actividade. 

A primeira sesión, ofrecida por Javier Rodeiro, tivo lugar o día 5 e centrouse na idea e no modelo de negocio. Seguiralle o día 12 unha sesión sobre a perspectiva xurídica das distintas formas de emprendemento, a cargo de Juan Manuel de los Ríos. Xa o día 19 de novembro Francisco Javier Sánchez Sellero abordará co alumnado asistente a viabilidade económico-financeira dos negocios e o día 25 Vanessa Mª Suárez e María Montserrat Cruz falaranlles da promoción e comercialización do proxecto empresarial. A formación ten un carácter enfocado á súa aplicación real, buscando darlle ao estudantado coñecementos que lle axuden a transformar en realidade as súas ideas de emprendementos. 

Venture Lab Campus Auga 

O evento enmárcase no Venture Lab Campus Auga, iniciativa que arrancou o ano pasado levando a cabo unha primeira edición destas xornadas de Formación para a innovación. O emprendemento do alumnado universitario. Seguiulle a publicación do libro Plan de Formación de Innovación 2024, que ofrece un enfoque integral sobre o emprendemento empresarial, adaptado de xeito espacial ás necesidades do alumnado universitario interesado neste tema. Este manual é un dos materiais empregados polas e polos asistentes ás xornadas que se están a celebrar este mes no campus. 

Este curso académico a programación deste Venture Lab arrancou coa celebración en setembro da xornada Emprendendo no campus, na que os membros da comunidade universitaria e persoas interesadas tiveron a oportunidade de coñecer de primeira man os proxectos de estudantado que xa deron o paso de emprender e que, en diversos concursos e convocatorias deste eido, lograron destacar. Complementando a programación da formación que agora se imparte no Campus Auga e como peche das actividades do Venture Lab Campus Auga deste ano, está prevista a celebración en decembro dunha xornada na que se contará con emprendedoras e emprendedores externos inspirarán ao alumnado universitario coas súas experiencias e proxectos.