DUVI

Diario da Universidade de Vigo

Nun obradoiro impartido pola catedrática de Dereito Mercantil María José Morillas

Alumnado de Dereito ponse ao día sobre as novidades normativas en responsabilidade civil na circulación de vehículos

Ante a próxima entrada en vigor da directiva europea na materia

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Académica
DUVI Ourense 25/10/2022

A Área de Dereito Mercantil da Facultade de Dereito do campus de Ourense celebrou este martes o obradoiro O seguro obrigatorio de responsabilidade civil pola circulación de vehículos de motor e a nova Directiva (UE) 2021/2118. Nel, María José Morillas, catedrática de Dereito Mercantil da Universidad Carlos III de Madrid, afondou co alumnado do centro nas novidades normativas neste eido.

A actividade estivo dirixida por Ana María Tobío, catedrática de Dereito Mercantil da UVigo, e Juan Manuel de los Ríos, profesor titular desta área e vicedecano da Facultade de Ciencias Empresariais e Turismo. Na súa intervención, María José Morillas analizou “as novidades que introduce a última directiva europea sobre responsabilidade civil na circulación de vehículos de motor, que é unha materia de enorme importancia polo número de persoas que falecen e resultan lesionadas cada ano”. Ao longo da súa intervención, abordou “en que medida vai haber que modificar a lexislación española para incorporar as novidades que introduce esta directiva” e tamén falou “das materias nas que a nosa lexislación está perfectamente alienada co dereito europeo”. Segundo indicou a experta, ante esta directiva “temos de prazo ata finais do ano que vén para adaptar o dereito por iso é un bo momento para ver en que posición estamos”.

Cobertura das vítimas

A catedrática de Dereito Mercantil salientou que a primeira novidade que introduce esta Directiva (UE) 2021/2118 “é a nova definición de vehículo, que dá entrada a unha posible cualificación como tal dos novos vehículos de mobilidade persoal e dos vehículos autónomos”. Igualmente, indicou, introduce melloras nos niveis de cobertura mínimos obrigatorios, elevando a protección das vítimas, e engade a necesidade de que o consorcio de compensación de seguros asuma a reparación dos danos nos casos nos que a aseguradora está en liquidación ou en concurso. “É dicir, esta directiva afianza a visión do lexislador europeo de incrementar a protección das vítimas, entendendo por vítimas non só aos ocupantes do vehículo que non foi responsable do accidente senón tamén aos peóns, ciclistas, etc”, afirmou a experta.

En comparación co actual marco normativo que se aplica no contexto estatal, María José Morillas sinalou que “por exemplo, nos niveis de cobertura, España está por riba dos mínimos que esixe a nova directiva europea pero en outras materias si que é necesario adaptar a nosa lexislación”. Entre este último suposto citou as novas funcións do consorcio de compensación de seguros, que ata o de agora, indicou, “asumía en certa medida a reparación dos danos cando a aseguradora é insolvente pero a directiva europea xa contempla maior alcance”.