Diario da Universidade de Vigo
Ata o vindeiro 14 de abril
Alumnos Erasmus de Belas Artes amosan os seus traballos na exposición “A lo mejor”
Os artistas proceden da Universidade de Kingston Upon Thames, no sur de Londres
Aínda que estamos afeitos a que os novos artistas formados na Facultade de Belas Artes amosen as súas obras non é tan común que eses creadores sexan todos estranxeiros. Isto é o que sucede na exposición A lo mejor, na que seis alumnos Erasmus procedentes de Reino Unido amosan os traballos feitos ao longo da súa estancia en Pontevedra. Os autores das obras veñen da Universidade de Kingston Upon Thames, no sur de Londres e levan tres meses estudando no centro pontevedrés.
A coordinadora do programa Erasmus da Facultade de Belas Artes e profesora de Extensión e Repercusión das Linguaxes Artísticas, Silvia García, explicou que “a iniciativa forma parte da formación dos estudantes, xa que non chega con que fagan un proxecto senón que cómpre que saiban cal é a mellor forma de amosalo aos demais”.
En moitas ocasións, os artistas teñen que modificar as súas obras ou polo menos preparar o lugar onde as van a amosar, xa que en función do que queiran transmitir necesitarán un tipo de localización diferente, pode ser unha cor de parede determinada, un mínimo espazo, etc. Isto é precisamente co que se enfrontaron os alumnos ingleses que durante varios días prepararon a mostra para ser vista polo público. Segundo comentou a súa profesora, Silvia García, “a idea é que os rapaces teñan un achegamento ao mundo profesional e que vexan os problemas técnicos dunha sala e como os poden solucionar”.