Diario da Universidade de Vigo
Este martes estiveron en Vigo e, en breve, desprazaranse a Pontevedra e Ourense
Arracan no campus as actividades dunha nova xeración de ‘axentes do cambio’
Son nove alumnas voluntarias encargadas de difundir a Axenda 2030 e os seus valores entre o alumnado
Lucía Blanco e Laura Betancourt, dúas das voluntarias, no posto instalado este martes na Escola de Enxeñería Industrial
A coincidencia coa celebración do Foro Tecnolóxico de Emprego fixo que numeroso público se achegase á mesa informativa
O vindeiro luns as axentes do cambio desprazaranse á Facultade de Comunicación, en Pontevedra
A UVigo conta xa cunha nova xeración de ‘axentes do cambio’, un grupo de nove alumnas dos tres campus dispostas a espallar entre toda a comunidade universitaria a Axenda 2030 e os seus valores, así como a adopción de hábitos sustentables. Levan meses formándose e este martes arrancaron na Escola de Enxeñaría Industrial, aproveitando a inauguración do Foro Tecnolóxico de Emprego, as campañas presencias que as levarán aos tres campus.
Como en anos anteriores o voluntariado desenvolverase durante todo o segundo cuadrimestre e, ademais das actividades presenciais, entre elas xogos e sorteos, realizarán tamén diferentes campañas en redes. Trátase de animar, sobre todo ao estudantado, a coñecer máis sobre a Axenda 2030 e a reflexionar sobre os seus hábitos e pensamentos sobre a sustentabilidade.
Defínense a si mesmas como persoas comprometidas co desenvolvemento sostible, coa función de amosar ao alumnado universitario, “de igual a igual”, sobre que é a Axenda 2030, para construír “entre todas e todos, unha universidade sostible”. Buscan “sensibilizar” sobre o momento crítico no que se atopa a sociedade e da necesidade de mudar hábitos, crenzas e comportamentos para contribuír á defensa do planeta e acadar un mundo máis solidario, xusto e inclusivo.
Nove alumnas dos tres campus comprometidas co cambio
Nesta ocasión o grupo de voluntarias de ‘axentes do cambio’ está composto por nove alumnas: seis do campus de Vigo, dúas do de Pontevedra e unha do de Ourense. As encargadas de atender esta mañá o posto da EEI foron Lucía Blanco Carballo, do Grao en Enxeñaría de Tecnoloxías de Telecomunicación, e Laura Betacourt Morales, estudante de Relacións Laborais e Recursos Humanos, acompañadas por un grupo de persoas voluntarias da cooperativa galega Somos Terra, colaboradora habitual desta actividade.
Completan o grupo de voluntarias as alumnas Fátima Martínez Fernández, do Grao en Linguas Estranxeiras; Ivanna Lourdes Fanin Oplakaniec, da Facultade de Ciencias Económicas e Empresariais; Marta Vila Giráldez, de Ciencias do Mar; Milagros Suárez Rey, de Bioloxía; Laura González Antuñano, Grao en Ciencias da Actividade Física e do Deporte; Carolina Muñiz, da Facultade de Comunicación, e Saray Rodríguez, da Facultade de Dereito.
A xira continúa a vindeira semana en Pontevedra
A xira polos tres campus continuará o vindeiro luns 17 no campus de Pontevedra, de 10.30 a 14.00 horas na Facultade de Comunicación, no exterior se o tempo o permite. A primeira visita ao campus de Ourense será o martes 25, neste caso no exterior do edificio de Ferro no mesmo horario.