Arranca en Vigo un obradoiro no que se analizan os principais desafíos xurídicos do sector pesqueiro

Achegar aos futuros profesionais as problemáticas xurídicas máis relevantes formuladas na actualidade no sector pesqueiro: desde a protección e xestión dos recursos ata os conflitos derivados da internacionalización das profesións marítimas, os dereitos laborais a bordo, o traballo feminino neste ámbito, as vulneracións dos dereitos humanos… Este é o principal obxectivo co que este martes arrancou en Vigo o obradoiro A pesca en Europa: desafíos e perspectivas 2021, cuxa docencia se prolongará ata o vindeiro mes de maio.

A actividade, que xa tivo unha primeira edición na primavera de 2020, está organizada ao abeiro do proxecto europeo Jean Monnet Unha visión europea dos océanos e os mares: pesca marítima e crecemento sostible, EU-Fishing, dirixido pola profesora da Área de Dereito do Traballo e da Seguridade Social Francisca Fernández Prol e que persegue visibilizar e analizar as medidas emprendidas pola Unión Europea para garantir un crecemento sostible, desde un punto de vista económico, social e medio ambiental do sector pesqueiro. “O obradoiro constitúe unha actividade máis do proxecto e, en termos xerais, persegue afondar no estudo das problemáticas xurídicas vinculadas ao sector marítimo-pesqueiro, pero tamén dar a coñecer as mesmas -e as súas solucións- aos axentes implicados, neste caso futuros profesionais do sector”, explica Fernández Prol

Pensado especificamente para o alumnado do Instituto Marítimo Pesqueiro

Participan no obradoiro unha trintena de estudantes de diversos ciclos e cursos do Instituto Marítimo Pesqueiro do Atlántico e a docencia corre a cargo de diferentes membros do proxecto de investigación vinculados ás universidades de Vigo, A Coruña e a  World Maritime University, unha universidade marítima de posgrao con sede en Malmö, Suecia, fundada pola Organización Marítima Internacional, axencia especializada das Nacións Unidas. “Impartiranse contidos teóricos e prácticos (normas básicas de aplicación, casos prácticos...) relativos ás temáticas seleccionadas: recursos pesqueiros, litixios internacionais no sector marítimo-pesqueiro, condicións de traballo e protección social dos pescadores, mulleres e pesca e dereitos humanos”, subliña a coordinadora do proxecto, ao que engade que, por mor das restricións sanitarias e á petición do instituto, os docentes impartirán as clase de modo telémático, a través do Campus Remoto da UVigo, si ben os alumnos estarán na aula.

O curso está coordinado pola profesora Belén Fernández Docampo e consta de cinco módulos de dúas sesións cada un deles. As clases arrancaron este martes co primeiro módulo, centrado na conservación e xestión dos recursos pesqueiros, impartido pola profesora da Universidade da Coruña Gabriela A. Oanta, directora do Instituto Universitario de Estudos Europeos Salvador de Madariaga, quen, tras unhas consideracións introdutorias sobre a Unión Europea e a Política Pesqueira Común, analizou en detalle a loita da UE contra a pesca ilegal,  non declarada e non regulamentada, os acordos de colaboración de pesca sostible e o panorama existente no mundo da pesca tras a sinatura do Brexit.

En marzo terán lugar os módulos II e III; o módulo II correrá a cargo da profesora da World Maritime University Laura Carballo Piñeiro e centrarase no tema da internacionalización; no III, específico sobre traballo feminino e pesca, impartirá unha sesión Annina Cristina Bürgin, xerente da Fundación Marinnleg, e a outra correrá a cargo da profesora Fernández Docampo. Dos módulos IV e V encargaranse integramente docentes da propia Universidade de Vigo. O catro, o traballo no sector pesqueiro, impartirano en abril Francisca Fernández Prol e Jaime Cabeza, e o cinco, pesca e dereitos humanos, será impartido por Belén Sánchez Ramos e Irene Dozo Mougán, secretaria técnica deste obradoiro.