Arredor de 150 persoas de 12 países danse cita no congreso internacional de patrimonio no medio rural Sopa

O concello ourensán de Calvos de Randín acolleu este luns o arranque do Congreso Internacional sobre Socialización do Patrimonio no Medio Rural (Sopa), que se prolongará ata o día 8. Nel danse cita arredor de 150  persoas (investigadores, mediadores culturais e emprendedores de 12 países) e cotnará coa presentación de máis de 60 comunicacións de países como México, Colombia, Chile, Arxentina, Grecia, Alemaña, Portugal e España.

"Este congreso celébrase anualmente co obxectivo de explorar novas formas de abordar a relación patrimonio-comunidade, compartir memorias colectivas e promover o intercambio entre coñecementos diversos e procesos de construción do coñecemento", sinalan desde a súa organización. O evento, que se celebra por segunda vez en Galicia, está organizado nesta ocasión polo GEAAT, Grupo de Estudos de Arqueoloxía, Antigüidade e Territorio da Universidade de Vigo, a través dos seus membros Beatriz Comendador e Óscar Penín, contando tamén co apoio da Bela Auria, da Rede Aldear, da Deputación de Ourense e de La Underground Colectiva.

A programación desenvólvese nos concellos rurais ourensáns de Os Blancos, Baltar, Calvos de Randín e Muíños, escollidos pola riqueza patrimonial da zona rural transfronteiriza entre Galicia e Portugal. Sobre os seus obxectivos, os promotores de Sopa lembran que este congreso internacional naceu para “educar no común, contactar, facilitar o acceso e a transmisión do patrimonio no medio rural; traballar no sentimento colectivo, con xente que quere comprometerse coa comunidade, que quere cambiar as formas de relacionarnos coa nosa cultura, e emancipar o coñecemento mediante a expansión dos saberes e a cocreación de contidos e metodoloxías”.

Da teoría á práctica

Ao longo dos días de congreso está prevista a celebración de diferentes sesións teóricas sobre temas como políticas culturais, metodoloxías participativas e análise e estudos relacionados co patrimonio rural e as comunidades ás que está vinculado. No apartado de sesións de proxectos presentaranse propostas executadas ou en fase de desenvolvemento, deseñadas no ámbito do patrimonio rural e do traballo con comunidades. Estes proxectos están vinculados a unha ampla e diversa variedade de temas, como a xestión de territorios; o turismo comunitario; a tradición oral e/ou tradición mnemónica e as redes culturais.

Ademais, haberá un seminario monográfico titulado O maior saber, o saber maior no que se porá o foco, con especialmente atención, nos saberes herdados a través das persoas maiores, contando cunha xornada dedicada integramente a este tema e onde intervirán, entre outros, os antropólogos ourensáns Manuel Mandianes e Fátima Braña. "Que mellor homenaxe para celebrar a vida que dedicar o seminario deste ano ás persoas maiores, en moitas ocasións grandes protagonistas dos procesos de socialización do patrimonio cultural e da memoria colectiva, e, sobre todo, no rural", comentan desde a organización do evento. O programa completarase con numerosas actividades culturais e lúdicas, moitas delas enmarcadas no Festival de Saberes Pedra, entre as que se inclúen teatro, música, cinema documental e narración oral.

Deste xeito, o primeiro día a actividade arrancou coa inauguración, na que participaron, ademais de membros da organización, representantes dos concellos implicados na iniciativa e a vicerreitora de Extensión Universitaria da UVigo, Susana Reboreda. Seguiu cunha conferencia sobre a arqueoloxía do Val do Salas a cargo de Juan Galiña (investigador da Universidade de Vigo) e o arqueólogo Eduardo Breogán e outra sobre as paisaxes agro-pastorís e arquitectura popular tradicional na rexión transfronteiriza do Gerês/Xurés, a cargo do arquitecto Fernando Cerqueira. Esta primeira sesión completouse con visitas ao xacemento da Torre da Piconha e ao Couto Mixto, estando previstas xa pola noite varias actuacións de teatro a cargo das compañías Fantoches e  Almealera. Xa o martes a programación trasladarase aos Blancos.