A Máster Class Audiovisual Galego clausurou a súa 12ª edición cunha entrega de premios
Augal recoñece ‘Cando o tempo acabe’ como mellor curta do pasado curso
Dirixida por Miguel Gómez Abad, naceu como TFG de varios alumnos
“Nun mundo colapsado por unha grave crise climática, Elba, unha brillante científica, tentará resolver un erro do seu pasado a calquera custo”. Deste xeito preséntase Cando o tempo acabe, unha curtametraxe de ciencia ficción dirixida polo titulado en Comunicación Audiovisual Miguel Gómez Abad que na tarde deste xoves se alzaba co premio á mellor curta do pasado curso na sesión de clausura da Máster Class Audiovisual Galego, Augal. Promovida pola Facultade de Ciencias Sociais e da Comunicación co patrocinio da Axencia Galega das Industrias Culturais da Xunta de Galicia (Agadic), Augal pechou a súa segunda edición cunha xornada titulada A canteira da FCSC, dirixida a premiar as mellores curtas realizadas o pasado curso polo alumnado da facultade no marco da súa formación académica.
Nove curtas, realizadas como traballos para diferentes materias ou como traballos de fin de grao (TFG) optaban a uns galardóns decididos por un xurado integrado pola actriz Carmen Méndez, membro da xunta directiva da Academia Galega do Audiovisual, Alberto Urruti, desenvolvedor de contidos de Ficción Producciones, e a exalumna Laura Guizán, coordinadora do OUFF en Curto, do Festival Internacional de Cine de Ourense. Tras a proxección das nove curtas seleccionadas na sesión de peche de Augal, o xurado decidiu outorgar un primeiro premio cunha dotación económica de 300 euros a Miguel G. Abad, que o pasado curso xa fora premiado nesta Máster Class Audiovisual Galego por O que queda de nós, así como outorgar un segundo premio, cunha dotación de 200 euros, a Solpor, de Susana Alba.
Unha curta na que a atmosfera é a principal protagonista
Rodada o pasado mes de marzo, o premio outorgado nesta sesión de Augal constitúe o primeiro galardón para Cando o tempo acabe, estreada hai unhas semanas na última edición no Festival do Imaxinario de Vilagarcía e seleccionada tamén para o Riocce Fright Night Film Festival de Río de Xaneiro e a Mostra de Curtametraxes de Ferrol. “Tiven a oportunidade de ver algunhas das curtas que se presentaban xunto á nosa e había un gran nivel, polo que estamos moi agradecidos”, sinala Gómez Abad, director tamén da curtametraxe premiada na anterior edición desta máster class, O que queda de nós, unha peza que acadou máis de 40 seleccións en festivais e sete premios.
Como xa fixera nesta curta, Gómez Abad apostou de novo en Cando o tempo acabe polo xénero da ciencia ficción coa idea de “falar de problemas actuais, como é neste caso o cambio climático, ou de temas máis introspectivos, como pode ser a soidade”. Fíxoo nunha obra “distópica”, na que “nun mundo devorado por unha crise climática, unha personaxe quere resolver un erro do pasado a calquera costa”. Gravada na cara norte de Manzaneda, nun espazo “inhóspito”, trátase dunha curta na que a atmosfera ocupa un papel central, coa idea de xerar “unha serie de sensacións” no espectador, nunha peza que permite “bastantes lecturas”, como recoñece o seu director. “Para nós xerar esa atmosfera era o máis importante, traballamos desde o principio co son e a fotografía coa idea de crear unha serie de sensacións”, salienta Gómez Abad dunha curta que recoñece á súa vez como “unha espiña cravada”, xa que se trataba dun proxecto previsto para 2020 e que a pandemia obrigou a adiar. De feito, o guión e produción deste proxecto formaron parte do TFG que defendeu en 2021, mentres que o resultado final dun proxecto no que participaron diferentes estudantes da facultade converteuse no traballo de fin de grao de Jorge Díaz e Juan Garrido, responsables precisamente, do son e da fotografía da curta.
Por outra banda, o xurado tamén recoñeceu o traballo de Susana Alba, unha curta que, como explica, pon o foco “no tema da soidade”, a través da historia “dun home que queda sen traballo e que, por non defraudar á súa familia, decide marchar”. Nacida tamén como un TFG, Alba recollía “con moita ilusión” o galardón outorgado a Solpor, que se suma ao acadado no Angus Film Festival, en Madrid, e ás dúas mencións recibidas nun certame promovido pola USC.
Xunto ás premiadas, nesta sesión puideron verse tamén as curtas Ágape, de Patri Villalón; Asunción, de Andrea Varela; Flores blancas, de Marcos Herrera; My Truth, de Marta Bouzas; Love Core, de Manu Sacoga e Noelia Sánchez; Cairo, de Hugo Rodríguez e Miguel Romero; e Carlos foi vivir ó mar, de Fernando Areal.
Punto de encontro cos profesionais do audiovisual
Este acto de clausura contou coa participación da decana de Ciencias Sociais e da Comunicación, Emma Torres, e do director da Agadic, Jacobo Sutil, que xunto ao profesor Paulino Pérez, coordinador de Augal xunto con Miguel Anxo Fernández, encargáronse de entregar os diplomas aos preto de 70 alumnos e alumnas que asistiron á decimo segunda edición desta máster class. Entre os meses de outubro e decembro, Augal permitiu ao alumnado achegarse ás diferentes fases de traballo no desenvolvemento dunha produción audiovisual nunha serie de encontros con directores, produtores e guionistas. O ciclo abriuse nesta ocasión con tres sesións centradas na serie Rapa, nas que participaron, entre outros, o seu director, Jorge Coira, e o guionista Pepe Coira. Así mesmo, Augal permitiu coñecer longametraxes como Welcome to ma maison, de Andrés Goiteira, ou Jacinto, de Javi Camino, ao igual que a serie Operación Marea Negra, a través dun encontro cos seus produtores executivos Mamen Quintas e Toni Veiga.