Novas do DUVI

A Universiada, unha aposta de cidade

• Vigo

A posibilidade de que Vigo sexa sede da Universiada do ano 2013 ou 2015, centra o artigo de opinión do tenente de alcalde, Santiago Domínguez Olveira.
Quen foi promotor da candidatura de Vigo, reflexiona no DUVI sobre a importancia deste evento e a súas repercusión para a cidade en xeneral e a Universidade en particular.
Domínguez Olveira afirma que “é un reto complexo” pero tamén se mostra convencido de que a cidade é quen de “construír un proxecto común”. Con esta finalidade constituíase hai uns días a Plataforma Cidadá Pro Universiada, integrada por institucións, partidos políticos e organizacións sociais, unidos para apoiar e colaborar na promoción da candidatura viguesa.
O tenente de alcalde salienta, ademais, a colaboración que en todo momento “teño atopado por parte da Universidade de Vigo e especialmente o respaldo que o rector Alberto Gago ten dado a este proxecto”.

02/10/2007

Presente e futuro dos fondos e plans de pensións

• Vigo
• Académica

Os recentes cambios na lexislación sobre os fondos e plans de pensións, fan necesaria unha actualización dos coñecementos neste ámbito. Con este obxectivo de renovación, a Universidade de Vigo en colaboración coa Universidade Internacional Menéndez Pelayo organiza estes días un seminario que se desenvolve no Centro Social Caixanova.

01/10/2007

As construcións do campus convértense nun museo para os vigueses

• Vigo
• Cultura

Con motivo do Día Mundial da Arquitectura programáronse visitas guiadas ao campus de Vigo, co propósito que de que os cidadáns se acheguen ao valor arquitectónico das súas infraestruturas. A delegación local do Colexio Oficial de Arquitectos de Galicia organizou un percorrido a través da historia da institución que permitiu aos participantes coñecer os proxectos da man dos seus autores. A iniciativa, que pretende acadar unha maior identificación da cidade de Vigo co seu campus universitario, atraeu a estudantes e persoas de todas as idades. Ao tempo que aprenderon sobre arquitectura, os visitantes mergulláronse na actividade docente e investigadora da Universidade

01/10/2007

Último prazo de preinscripción e matrícula para POP,s con prazas vacantes

• Vigo
• Institucional

Do 1 ao 4 de outubro permanecerá aberto o derradeiro prazo de preinscripción nun total de once Programas Oficiais de Posgraos nos que quedan prazas vacantes.
Os POP,s nos que aínda é posible realizar a preinscripción e posterior matrícula son os seguintes: Técnicas Estatísticas, Ciencia e Tecnoloxía Agroalimentaria, Fotónica e Tecnolxías do Láser, Prevención de Riscos Laborais, Xestión e Dirección Laboral, Química Teórica e Modelización Computacional, Ciencia e Tecnoloxía Química, Física Aplicada, Neurociencia, Dirección e Planificación do Turismo e Enxeñaría Matemática.
A oferta de Programas Oficiais de Posgrao da Universidade de Vigo complétase cara ao vindeiro curso cos POP,s en Dereito Urbanístico e do Medio Ambiente e Enerxía e Sustentabilidade, nos que as prazas ofertadas xa están totalmente cubertas.

 

01/10/2007

A USC acolleu o acto oficial de inauguración do curso 2007-2008

• Vigo

Os tres reitores das universidades galegas inauguraron oficialmente o curso acompañados polo presidente da Xunta, Emilio Pérez Touriño. O investimento en investigación e a adaptación ao Espazo Europeo de Educación Superior centraron unha cerimonia coa que se deu pistoletazo de partida a un curso no que haberá 75.000 alumnos en 168 titulacións e 73 títulos oficiais de posgrao.

28/09/2007

Investigadores e empresarios aprenden a redactar propostas para o VII Programa Marco

• Vigo
• Investigación

A Universidade ten en mente a creación dunha Oficina de Proxectos Europeos, inserida na OTRI, Oficina de Transferencia de Resultados de Investigación, que servirá de canle para todos aqueles investigadores que queiran presentar proxectos á Unión Europea. Así o comunicou este venres o vicerreitor de Investigación, Manuel Reigosa, na inauguración dun taller seminario de redacción de propostas do VII Programa Marco.

28/09/2007

O Servizo de Deportes abre o prazo de inscrición nas Ligas Universitarias 2007-08

• Vigo
• Deportes

O Servizo de Deportes abre o prazo de inscrición nas Ligas Universitarias 2007/08 para os campus de Pontevedra e Vigo. Tanto en categoría feminina como masculina, os campionatos comprenderan as modalidades de baloncesto, balonmán, fútbol sala, fútbol 7, rugby 7 e voleibol. Como gran novidade neste curso estréase a Bolsa de Xogadores, para que os deportistas poidan inscribirse de xeito individual.

28/09/2007

Inaugúrase a exposición “Afinidades Selectivas”

• Vigo
• Cultura

O intercambio de “afinidades” entre profesores, alumnos e ex alumnos da Facultade de Belas Artes de Pontevedra, é a base do proxecto expositivo “Afinidades Selectivas” que ata o 4 de novembro pode visitarse na Casa Galega da Cultura.

27/09/2007

A Área de Normalización Lingüística abre o prazo de matrícula para os cursos de formación en lingua galega

• Vigo
• Académica

A Área de Normalización Lingüística organiza neste primiero cuadrimestre seis cursos de formación en lingua galega. De nivel incial, intermedio e específicos, a matrícula estará aberta ata o vindeiro 11 de setembro. A oferta comprende cursos de redacción de textos en galego, de extensión cultural, de comunicación oral ou de galego científico-técnico. A solicitude debe formalizarse a través da plataforma Bubela.

27/09/2007

A cátedra Eurorrexión afondará na relación entre Galicia e o norte de Portugal

• Vigo
• Institucional

Coa finalidade de dar unha resposta social e instutucional ás relacións que manteñen Galicia e o norte de Portugal, a Universidade de Vigo e Caixanova crean unha nova cátedra que estará arroupada por un conxunto de actividades orientadas a incrementar os vínculos que existen na eurorrexión.
Precisamente o Reitor da Universidade de Vigo, Alberto Gago, referiuse a eurorrexión como “unha realidade que vai máis alá dos factores institucionais”, e aportou datos relevantes como que o 50% do tránsito de vehículos lixeiros e o 30% do de mercadorías entre España e Portugal, prodúcese na área xeográfica formada por Galicia e o norte de Portugal. Asemade, confirmou Gago, “Galicia é o mellor cliente rexional de Portugal do que importa 2.000 millóns de euros de mercadorías, mentres que o país veciño importa de Galicia un 15% de todas as nosas exportacións”.

27/09/2007

O autobús Eures visita o campus para informar aos estudantes sobre emprego en Europa

• Vigo
• Institucional

Preto de un millón e medio de oportunidades de emprego para toda Europa. Está é a oferta coa que se atopan as persoas que estes días visitan o “Eures Tour”, un autobús da Consellería de Traballo que este mércores se achegou ao campus de Vigo a modo de oficina itinerante para informar aos estudantes das oportunidades de emprego máis aló das nosas fronteiras.

26/09/2007

A directora Xeral de Transportes da Xunta da Galicia inaugurou o curso na Escola Universitaria de Estudos Empresariais

• Vigo
• Institucional

A E U de Estudos Empresariais acolleu o acto de recepción e benvida aos novos alumnos que comezaban este ano a súa carreira. A directora xeral de Transportes da Xunta de Galicia, Mar Chao López, foi a encargada de impartir a lección inaugural e de achegalos ao mundo laboral. No seu relatorio, Chao analizou diversos conceptos que, como ela mesma sinalou, “estudaredes máis detalladamente ao longo destes anos e empregaredes constantemente na vosa vida profesional”.

26/09/2007

O programa Ensaiamos continúa ofrecendo aos grupos musicais un local para tocar

• Vigo
• Cultura

Despois do éxito de participación do pasado curso, o programa Ensaiamos volve no comezo do curso co obxectivo de ofrecer un espazo gratuíto e común aos grupos musicais. Dende este mércores e ata o vindeiro 11 de outubro permanecerá aberto o prazo de inscrición para que todas aquelas bandas interesadas presenten as súas solicitudes.

26/09/2007

21.500 alumnos inician o curso nos tres campus

• Vigo
• Institucional

A Universidade de Vigo iniciará este curso, en tres ou catro titulacións, os cambios necesarios cara á adaptación ao Espazo Europeo de Educación Superior. O proceso, segundo confirmou hoxe Alberto Gago, iniciarase por titulacións que pola súa exclusividade non interfiran na oferta xeral do Sistema Universitario Galego e comezará no momento que determine a Consellería de Educación que proximamente convocará unha comisión para falar deste asunto.
O Reitor lembrou que a lei marca o curso 2010/2011 como o da fin das matriculacións no sistema actual, polo que chegada esa data a reforma das titulacións ten que estar feita.
Sobre os títulos de máster, Gago, avanzou que para este curso a Universidade de Vigo ten 20 propostas ás que resulta inviable dar saída na súa totalidade polo seu elevado número.

25/09/2007

Caras novas e vellos coñecidos no comezo do curso

• Vigo
• Académica

A vida volve aos tres campus da Universidade de Vigo co comezo das clases. Os novos estudantes, que se estrean na andaina universitaria, coincidiron cos alumnos de cursos superiores no primeiro día de docencia do curso 2007-2008. O ano académico iníciase con importantes novidades nas infraestruturas da institución. No campus de Vigo está previsto o remate das obras do Módulo Tecnolóxico Industrial de CITEXVI, así como a resolución do concurso do proxecto de Vías Elevadas. Antes do remate do primeiro cuadrimestre será inaugurado o Centro de Investigación, Transferencia e Innovación, CITI, no Parque Tecnolóxico de Galicia en Ourense, centrado na investigación agroalimentaria. En Pontevedra, o edificio de Ciencias da Educación e do Deporte entrará na terceira fase coas obras do módulo de departamentos e laboratorios e os vestiarios.

O curso comeza con importantes novidades no eido das infraestruturas

25/09/2007