Por moitos exercicios de adestramento que haxa que facer, prácticas que desenvolver na facultade ou traballos que entregar, o día só ten vintecatro horas. Aínda así, Rebeca Mariño e Narazet Tilve conseguen facer malabarismos co seu tempo para atender aos seus estudos e manterse no máis alto nivel do taekwondo nacional. Hai unhas semanas foron as protagonistas da final do Campionato de España en peso galo, no que Mariño levou o ouro e Tilve a prata. Rebeca vén agora de repetir éxito, desta vez un bronce, no Open de México. “Tes que decidir", asegura, unhas horas para estudar e outras para adestrar”, ao que Tilve engade "se queres, tes tempo, é cuestión de organizarse”. Son dous bos exemplos do alto nivel que ano tras ano está acadando o taekwondo na Universidade de Vigo, que xa ten postas as miras no Campionato Universitario que os vindeiros 2 e 3 de maio terá lugar no campus vigués.
22/04/2009