Novas do DUVI

Os alumnos de Dereito coñeceron o funcionamento xudicial na cidade das Burgas

• Ourense
• Académica

A Sala da Audiencia Provincial, os distintos xulgados e unha atractiva Sala de Recoñecemento foron algunhas dependencias que deixaron de resultar descoñecidas para un grupo de estudantes de primeiro de Dereito. Guiados polo vicedecano, Iago Fariñas, preto de trinta alumnos asistiron a unha tarde de visita polas principais instalacións xudiciais de Ourense: o Palacio de Xustiza e o Colexio de Avogados, onde contaron coas intervencións e consellos do xuíz decano, Antonio Piña; o secretario do xulgado social nº3, J.Luis Roig e o director da Escola de Práctica Xurídica, Alejandro Garrido.

10/10/2007

O "Anuario da Facultade de Dereito 2006" contribúe ao debate xurídico

• Ourense

Reflexións, investigacións e análises levadas a cabo por membros da Universidade e colaboradores de outras entidades, acaban de saír publicadas no Anuario de Dereito 2006.
No seu interior conta con máis de trinta achegas que afondan nos retos máis actuais do ordenamento xurídico co fin de contribuír ao seu debate.
En total, conforman 647 páxinas, que supoñen ademais unha vía excepcional para difundir os traballos que moitas ves restan nos caixóns dos despachos.

09/10/2007

Estudantes, profesores e traballadores elixen as bicicletas para acudir ao Campus

• Ourense
• Institucional

Centos de ciclistas están a invadir a cidade de Ourense, e non é porque estea pasando o Tour, senón porque xa son moitos os que se benefician do sistema de préstamo gratuíto de bicicletas levado adiante polo Concello e o Instituto Enerxético de Galicia.
Cun total de 100 exemplares, calquera pode acceder ao aluguer en cinco puntos da cidade. Un deles atópase ao carón do Edificio Politécnico, o que asegura que toda a comunidade universitaria poida acudir ao Campus dun xeito ecolóxico, saudable e gratuíto.

08/10/2007

A transferencia de coñecemento e a reforma dos usos docentes, eixos centrais da inauguración do curso

• Ourense
• Institucional

“É moito o que temos por diante, pero tamén é grande a convicción de que podemos conseguilo”. Con estas palabras finalizaba a súa intervención o Reitor, Alberto Gago, no acto de apertura do curso 2007/2008 na Universidade de Vigo, celebrado no salón de actos do Edificio Politécnico de Ourense.
Unha ampla representación da comunidade universitaria, así como responsables políticos e responsables de organismos e entidades económicas e sociais, asistiron ao acto que se iniciou coa lectura do resumo dos feitos máis salientables do curso pasado a cargo da secretaria xeral, Esther González Pillado. O catedrático de Historia Contemporánea, Jesús de Juana López, foi o seguinte en tomar a palabra para pronunciar a lección inaugural titulada “Historia e galeguidade”, na que reflexionou sobre o papel do historiador e a identidade. O Reitor, Alberto Gago, pechou o acto cun discurso centrado nos retos do curso que acabada de comezar, poñendo o acento na transferencia de coñecemento e na docencia.

Esther González: "A Universidade consolidou a súa capacidade competitiva en investigación"
Jesús de Juana: "A historia do presente é unha historia herdada"
Alberto Gago: "Hai que crear coñecemento, pero sobre todo transferilo e aplicalo”

05/10/2007

Jacobo Fernández e Diego Blanco levan ao campus a festa galega do cómic

• Ourense
• Cultura

Tomar un café ou pasear polos corredores da facultade ao carón de obras recoñecidas da banda deseñada, son a partir de hoxe dúas opcións compatibles.
Na primeira planta do Edificio Politécnico, “cacacuequi” e unha estraña rapaza incitan a desviar a vista cara as paredes; mentres que, na cafetería da Bibiloteca, unha escolma de debuxos de Diego Blanco acompañan aos momentos de lecer.
A estas obras súmanse oito exposicións e diversas actividades que se celebrarán en diversos espazos da cidade das Burgas ata o vindeiro 21 de outubro, data de remate da festa galega do cómic.

04/10/2007

"Hai que actuar porque isto ten data de caducidade como un iogur"

• Ourense
• Académica

Ata o vindeiro 11 de novembro, unha quincena de titulados nas ramas da Educación participarán no I Curso de Formación en Educación Ambiental, organizado pola Universidade co fin de complementar a formación dos desempregados.
No seu transcurso afondarán nunha chea de problemáticas medioambientais e as mellores metodoloxías para concienciar aos distintos colectivos. Ao seu remate poderán incluír no seu currículo a categoría de educador ambiental; o que ,seguramente, lles abrirá novas portas do mercado laboral.

03/10/2007

O POP de Fotónica e Tecnoloxías do Láser formará aos primeiros 24 especialistas

• Ourense
• Académica

O director xeral de I+D+i, Salustiano Mato, ademais de representantes doutras entidades, asistiron á sesión de apertura do posgrao interuniversitario orientado a formar especialistas no eido da fotónica e do láser. Nela, ademais de adiantar os contidos académicos, os asistentes percibiron a perspectiva actual deste mercado que move ao ano 2 billóns de euros, a cuarta parte do mercado mundial do automóbil. Dende operar miopía ata soldar carrozaría, múltiples son os eidos profesionais nos que poderán exercer os 24 alumnos matriculados. Pese a que inda non existe un forte núcleo ao que ter como referencia, en Galicia xa son moitos os que coñecen as vantaxes desta tecnoloxía. Algúns exemplos, invitados e presentes no acto a través dos seus representantes, son o Centro Tecnolóxico da Automoción de Galicia, CTAG, a Asociación de Investigación Metalúrxica do Noroeste, AIMEN, ou Radiantis.

02/10/2007

As I Xornadas de Medio Ambiente e Dereito Ambiental poñen punto de saída a un ambicioso proxecto para converter ao Campus de Ourense nun referente ecolóxico

• Ourense
• Académica

Está en boca de todos, o medio natural corre grave perigo. Por sorte, colectivos da sociedade seguen a pular por mudar esta traxectoria fatal. É o caso da asociación medioambiental Syme, que, en forma de información e con conferenciantes de elevado prestixio, levará a cabo a primeira edición dun seminario centrado na relación existente entre natureza e lexislación.
Un esforzo no que conta co apoio incondicional da Vicerreitoría do Campus de Ourense, lista para dar comezo a outras accións e proxectos co fin de preservar os espazos verdes e converterse nun exemplo de utlización de novas enerxías.

01/10/2007

As víctimas da represión franquista poderán xustificar o dereito á indemnización

• Ourense
• Investigación

Os familiares das vítimas da represión franquista poden xa acceder a unha páxina web na que consultar toda documentación existente sobre as persoas executadas, encarceradas, ou ben encausadas polos tribunais de guerra. Grazas ao traballo do Obradoiro de Historia de Galicia da Universidade os parentes poderán coñecer toda aquela información que deixara constancia documental. Introducindo un nome e un apelido os usuarios acceden a toda os datos achados nos últimos anos por este grupo de investigadores

28/09/2007

Varios universitarios coñeceron as vantaxes da conducción económica

• Ourense
• Académica

Optar polas marchas longas, renegar do punto morto ou facer o cambio antes de chegar á liña vermella, son algunhas das técnicas que impartiu o biólogo, Damián Cuadrado, a un grupo de estudantes co fin de introducilos nunha conducción máis eficiente. E é que está nos nosos pés reducir o 29% das emisións de CO2 que constitúen os medios de transporte. Se todos os usuarios fixeran caso desta campaña, os expertos aseguran que o aforro alcanzado permitiría plantar 48 millóns de árbores e circular gratis a 2,6 millóns automóbiles en España.

27/09/2007

Un equipo da ESEI achega o mundo do Software Libre á PEME galega

• Ourense
• Investigación

A través de catálogos, manuais de instruccións e unha aplicación web interactiva, a Escola Superior de Enxeñería Informática do Campus de Ourense tentará introducir un pouco máis ás PEME´s galegas no mundo do tecnoloxía libre. A iniciativa responde a un convenio coa Consellería de Innovación ideado co fin de mudar a actitude do pequeno empresario, inda moi reticente ao cambio. Os datos falan por si mesmos, segundo o CESGA, pese a ofrecer custes moi reducidos e gran independencia respecto ao provedor, só o 10% das pequenas empresas decántanse por este sistema en Galicia. Gracias a este proxecto os empresario poderá acceder, entre outros, a unha catalogación de ferramentas, onde se especifica como conseguilas e como mantelas, e unha aplicación web con toda a información.

26/09/2007

Varios titulados regresan ao Campus para converterse en especialistas en Dependencia

• Ourense
• Institucional

Co fin de paliar a escaseza de programas docentes específicos na área de Atención á Dependencia e complementar a formación, especialmente, daqueles titulados que se atopan no paro, esta semana comezará o “Curso de Especialista Universitario en Intervención e Atención a Persoas con Dependencia”. A primeira acción formativa e presencial que se fai en Galicia dende unha Universidade para converter aos desempregados en especialistas.

26/09/2007

O POP de Dereito Urbanístico e Medio Ambiente foi inaugurado

• Ourense
• Académica

Ideado pola decana da facultade de Dereito, Inés Iglesias, e apoiado, entre outras institucións, pola Consellería de Medio Ambiente e Desenvolvemento Sostible e o seu conselleiro, Manuel Vázquez, o Máster en Dereito Urbanístico e Medio Ambiente comezou onte a súa andaina cunha presentación pública na que interviñeron os principais responsables e colaboradores.
Pola súa banda, o coordinador do POP, Roberto Bustillo, orientou a súa intervención de cara aos estudantes alí presentes. Un grupo heteroxéneo formado por unha maioría de licenciados en dereito ao carón de arquitectos, enxeñeiros, economistas...

25/09/2007

Unha nova lanzadeira asegura o transporte continuo ata o campus

• Ourense
• Institucional

A partir de agora aos estudantes do Campus de Ourense resultaralles un pouco máis difícil xustificar as súas tardías á hora de acudir ás clases. A razón, o número 20, nome que recibe a nova lanzadeira disposta polos autobuses urbanos do Concello de Ourense para acudir ao recinto universitario.
Durante todo o curso, todos os alumnos poderán acceder a este percorrido de ida e volta dende o centro da cidade, concretamente, dende o Parque de San Lázaro.

25/09/2007

A ironía e a improvisación do colectivo FRICS inauguraron a nova tempada

• Ourense
• Cultura

A Sala Alterarte comezou esta tempada vestida de verbena e de estreo, o do novo comisario, Ignacio García. A inauguración correu a cargo dos protagonistas da primeira exposición, o grupo musical portugués denominado a Fanfarra Recreativa e Improvisada Colher de Sopa. Ataviados con camisas floreadas e diversos instrumentos comezaron a tocar na sala para logo continuar nas rúas da zona vella de Ourense, unha iniciativa inédita que cumpre co obxectivo de abrir as portas da sala de exposicións á cidade.

25/09/2007