DUVI

Diario da Universidade de Vigo

Coa sinatura dun protocolo para o seu programa de doutoramento

O Campus da Auga estreita lazos co Instituto Superior de Contabilidade e Administração do Porto

Fomentará a participación de alumnado e persoal investigador luso

Etiquetas
  • Estudantes
  • Medios
  • PDI
  • Ourense
  • Institucional
DUVI Ourense 22/05/2018

Fomentar a colaboración entre a Universidade de Vigo e o Instituto Superior de Contabilidade e Administração do Porto (ISCAP) do Instituto Politécnico do Porto no marco do Programa de Doutoramento Auga, Sustentabilidade e Desenvolvemento, que arrancou este curso académico no campus de Ourense. Con este obxectivo, Virxilio Rodríguez, vicerreitor en funcións do campus de Ourense, e Olímpio Castilho, presidente do ISCAP, veñen de asinar este luns na sede do centro luso un protocolo de colaboración entre as dúas institucións académicas.   

“O protocolo vén reforzar os lazos que xa unen o campus de Ourense-Campus da Auga co Instituto Politécnico do Porto no seu conxunto, co que xa se asinou un protocolo no marco do cal se conta coa colaboración desta institución universitaria no programa de doutoramento do Campus da Auga”, sinala Virxilio Rodríguez. Con esta nova sinatura, engade, “procúrase dar maior visibilidade ao ISCAP e lanzar o noso programa de doutoramento neste importante instituto en materia de contabilidade, ciencias empresariais, xestión e informática, que conta con máis de 5000 estudantes e que vén de cumprir 131 anos de existencia”.

Dirección de teses e prazas adicionais para estudantes

A iniciativa realízase ao abeiro do convenio marco de colaboración en programas de doutoramento asinado en novembro de 2014 entre a Universidade de Vigo e o Instituto Politécnico de Porto e xorde ante o interese do Instituto Superior de Contabilidade e Administração en que se poidan integrar estudantes e persoal investigador seu no Programa de Doutoramento Auga, Sustentabilidade e Desenvolvemento. Así, o protocolo acorda “fomentar a matrícula de alumnado e potenciar a participación de persoal investigador do ISCAP, mediante a dirección e co-dirección de teses asociadas a dito programa e o traballo común nas distintas áreas de investigación”. Para a dirección ou co-dirección de teses, as e os investigadores do ISCAP deberán cumprir os requisitos establecidos no Regulamento de Estudos de Doutoramento da Universidade de Vigo. 

Segundo recolle o protocolo asinado este luns, para o curso 2018/2019 o número de prazas destinado a solicitantes do ISCAP estará dentro das cinco prazas adicionais reservadas a estudantes do IPP. Os estudantes deste instituto luso tamén poderán concorrer ás outras 15 prazas de libre acceso que oferta anualmente o Programa de Doutoramento Auga, Sustentabilidade e Desenvolvemento do campus de Ourense.

O alumnado do Instituto Superior de Contabilidade e Administração do Porto que se matricule no programa de doutoramento será, a todos os efectos, alumnado de doutoramento da Universidade de Vigo e formalizará a súa matrícula de acordo coa normativa, estipulacións e prazos que aprobe esta institución académica. Os estudantes do centro luso matriculados poderán optar ao título de doutor ou doutora con mención internacional de acordo co regulamento pertinente. A vixencia do protocolo esténdese durante dous anos.