O campus conmemora o 8M reivindicando a educación en igualdade e para a paz

O campus de Ourense uniuse un 8 de marzo máis á conmemoración do Día Internacional da Muller e fíxoo tendo moi presente a guerra de Ucraína. Membros da comunidade universitaria asistiron á lectura dun manifesto colectivo elaborado pola Facultade de Educación e Traballo Social de reivindicación da educación en igualdade e para a paz. Nel subliñouse “a necesidade de loitar pola equidade e a paz” e avogouse polo “feminismo como movemento social transformador de loita pola xustiza social e a democracia”.

Delegadas e un delegado de curso dos diferentes graos da facultade deron lectura ao documento. Nel destacouse que “o patriarcado capitalista, neoliberal, heteronormativo, racista, clasista e capacitista ameaza non só a vida das mulleres, senón a supervivencia de toda a humanidade. O patriarcado é odio e gangrena. Desde aquí, pedimos o fin das violencias e das guerras e reivindicamos un movemento feminista internacional, interseccional e necesariamente inclusivo. Un feminismo de todas as persoas”. Durante o acto lembrouse que “vivimos momentos moi duros, sendo testemuñas do que ata hai apenas dúas semanas parecía impensable: outra guerra atroz, agora no corazón de Europa”. Esta guerra, afirmouse no manifesto, “do mesmo xeito que as que xa foron e as que serán, sostense sobre a columna vertebral da masculinidade hexemónica”.

O sufrimento de todas e todos

No manifesto denunciouse que “esta masculinidade hexemónica e tóxica, que xera e alimenta as guerras, é a mesma que, dun modo máis ou menos hostil, dobrega, violenta, vitimiza e arrebata a axencia ás mulleres”. Así, lembrouse como “as mulleres, na nosa diversidade, somos un colectivo significativamente vulnerable na sociedade patriarcal. A desigualdade de xénero estrutural causada polo patriarcado golpéanos desde múltiples frontes e atravesa todas as nosas vidas”. Entre esas frontes, o manifesto citou a violencia sexual e a violencia de xénero, a feminización da pobreza, o peso dos coidados, as dificultades de conciliación provocadas pola falta de corresponsabilidade e os teitos de cristal. Así mesmo, deuse lectura no acto, “na nosa pluralidade, hai mulleres que sofren tamén a violencia de “non poder ser”, que ven negado o seu dereito a ser, a vivir e a expresarse como realmente son; mulleres que sofren rexeitamento e violencia pola súa orientación sexual ou mulleres que non encaixan no ideal de muller branca e de clase media”. O sufrimento das mulleres, do mesmo xeito que o sufrimento do pobo ucraíno, indicouse no manifesto, “é e debe ser tamén o sufrimento de todas e todos”.

Na situación actual, o texto lido este martes no campus apuntou que “o sistema educativo, incluíndo a universidade, debe ofrecer unha educación pública e de calidade, baseada en valores de mínimos, aqueles que se ancoran na Declaración Universal de Dereitos Humanos e cuxo eixo central é o ben común, o ben de todas, o ben da humanidade. Unha práctica educativa coeducadora, intercultural e crítica, comprometida coa constante denuncia da inxustiza social e a loita activa por alcanzar unha alternativa transformadora”. Neste senso, lembrouse o compromiso da Facultade de Educación e Traballo Social co feminismo e co seu espallamento de xeito transversal a todos os sectores da comunidade universitaria.