As catro revolucións científicas relacionadas coa orixe da natureza, eixes centrais dunha conferencia do catedrático Federico Vilas

Enmarcada dentro da programación de actividades da Cátedra Almirante Álvarez Ossorio que a Universidade mantén conxuntamente coa Escola Naval Militar de Marín, este xoves terá lugar unha conferencia da man do profesor da Facultade de Ciencias do Mar e responsable da Área de Estratigrafía, Federico Vilas.
Baixo o título As catro revolucións científicas relacionadas coa nosa orixe, o catedrático falará sobre catro casos científicos directamente relacionados coas ciencias da terra e célebres pola controversia que desataron no seu tempo e que forman parte do reducido grupo de destacadas pezas mestras da historia intelectual. A revolución dos astrónomos, a revolución dos biólogos, a dos xeólogos e, actualmente, a dos planetólogos son os eixes cos que Vilas analizará os inicios da natureza e a influencia do universo que nos rodea.
O escenario que acollerá esta iniciativa é o auditorio do Centro Social Caixanova onde, a partir das oito da tarde e logo de escoitar a ponencia, os asistentes poderán establecer un coloquio co conferenciante.

Un amplo currículo

Licenciado en Ciencias Xeolóxicas e Doutor en Xeoloxía pola Universidade Complutense de Madrid en 1973, Federico Vilas Martín é membro da Real Academia de Ciencias Exactas, Físicas e Naturais ademais de ser xestor do Plan Nacional de I+D no Programa de Biodiversidade, Ciencias da Terra e Cambio Climático. Ao mesmo tempo foi secretario da comisión de Coordinación Científica de I+D, Acción Especial contra Vertidos Mariños Accidentais e como vocal do Comité Español do Programa Internacional de Correlación Xeolóxica da UNESCO. Na actualidade tamén é membro do comité español do programa ECORD-IODP, do Grupo Español de Sedimentoloxía, da Sociedade Española de Cuaternario, da Sociedade Xeolóxica de España, da Real Sociedade Española de Historia Natural e da International Association of Sedimentologists, entre outros.