A celebración de San Xosé, patrón da Escola de Enxeñería Industrial, regresa a Torrecedeira

Tras dous anos nos que a pandemia non o permitiu, a celebración do patrón da Escola de Enxeñería Industrial da Universidade de Vigo regresou á súa sede e data habitual. O acto institucional tivo lugar este xoves no paraninfo do centro en Torrecedeira, nunha demostración de recuperación case total da normalidade, xa que, como explicaba o director da EEI, Juan Pardo, no se discurso, “despois de moito esforzo e importantes investimentos, acadamos novos espazos que xa nos permiten retornar o paraninfo ao seu uso habitual, deixándose de impartir clases no mesmo”. 

Deste xeito, despois de ter que suspender o acto en 2020 e atrasalo ao mes de xuño en 2021, cando se celebrou na sede do campus, a EEI recupera o acto tradicional no que se rende homenaxe á comunidade educativa. Así, entregáronse, como outros anos, as distincións ao profesorado mellor valorado, ao persoal investigador novo, ao persoal de administración e servizos e ás e aos docentes que compren 30 anos de antigüidade no centro. A conferencia institucional correu a cargo de Bibiana Rodiño, directora xeral de Beta Implants, empresa dedicada ao deseño e fabricación de implantes para traumatoloxía, ortopedia e neurocirurxía veterinaria, coa que a Universidade de Vigo mantén varias liñas de colaboración. Rodiño, egresada da EEI na especialidade de Enxeñaría Mecánica, detallou a evolución deste proxecto, que arrancou en 2013, ata converterse na actualidade nun referente de excelencia empresarial no eido da bioenxeñaría.

Todas as titulacións con selos EUR-ACE

No seu discurso, o director da escola, Juan Pardo Froján, abordou tanto o presente como o futuro inmediato da EEI, facendo especial fincapé nos procesos de acreditación para a obtención dos selos internacionais EUR-ACE das titulacións de grao do ámbito industrial. “Cando iniciei a miña etapa, un dos obxectivos que nos marcamos era obter estes selos para todas a nosas titulacións de grao”, lembraba, e no ano 2021 rematou a 2ª fase do proceso “e acadamos este obxectivo, a pesar das dificultades engadidas que supuxo facer unha parte deste proceso nun período marcado pola pandemia. Este feito requiriu un maior esforzo para poder culminar o obxectivo con éxito”. No transcurso do acto, Pardo tamén recibiu de mans do director da Área de Calidade, Joaquín Collazo, o selo de calidade da Universidade de Vigo para a EEI con motivo da certificación do sistema de xestión da calidade consonte o programa Fides-Audit.

Respecto da oferta académica do centro, Pardo lembrou este ano graduarase a primeira promoción de Enxeñaría Biomédica e agradeceu a colaboración do Complexo Hospitalario Universitario de Vigo para sacar adiante con éxito esta titulación, “unha grande aposta para a nosa escola”. Tamén avanzou que o vindeiro curso está previsto que a escola estree dúas novas titulacións: o Grao en Automoción con mención Dual e o Mestrado en Enxeñería Biomédica e “seguimos a traballar para que a partir de 2023-2024 se incorporen novas titulacións de mestrado dentro do estudo G2030 e para contar con mestrados en Vehículos Autónomos e en Fabricación Aditiva”. 

Un “espazo renovado”

O director da EEI aproveitou a súa intervención para facer un balance destes dous últimos anos de loita conta a pandemia e quixo “resaltar o compromiso, a implicación e a responsabilidade de todas as persoas que formamos parte da escola (estudantes, PAS e PDI) para ser quen de superar esta difícil etapa de xeito moi satisfactorio, que fan sentirse a un orgulloso de pertencer a esta escola”. 

Unha das consecuencias da pandemia foi a reorganización dos espazos para poder manter a docencia presencial atendendo ás medidas de seguridade e distancia social. Isto implicou en moitos centros a necesidade de empregar lugares como cafeterías, salas de estudo ou salóns de actos como aulas, como foi o caso da EEI. Como explicaba Pardo, nestes dous anos o centro fixo un esforzo “para poder realizar o desenvolvemento da nosa docencia de xeito presencial, máxime tendo en conta a dimensión da nosa escola, pero nunca sen descoidar a seguridade das persoas”. Agora, o paraninfo volver ter os seus usos habituais, tras un proceso de renovación, polo que este acto é tamén “unha re-inauguración”, destacaba.

Recoñecementos

Unha das citas tradicionais deste evento de celebración do patrón da EEI é a entrega de recoñecementos, un xeito de “poñer en valor os labores docentes e investigadoras, así como tamén o papel destacado que desempeña o noso persoal de administración e servizos nun centro das nosas dimensións”. O director recalcaba que “todos os recoñecementos son moi importantes” pero quixo resaltar especialmente os que se outorgan ás mozas e mozos investigadores aos que lles foi concedida unha axuda predoutoral nalgunha das convocatorias do Ministerio, Xunta ou Universidade. “Non resulta fácil o camiño elixido que aposta por continuar formándose e seguir prepararse, pero é moi importante tratar de reter o talento na Universidade. Temos que facer un esforzo para darlle unha maior visibilidade a este labor, que é fundamental para o futuro da nosa escola e Universidade. Por esta razón, a miña mención especial para estes recoñecementos, pero tamén resaltando a importancia daqueles outro que amosan o compromiso das persoas coa calidade da docencia e tamén a do sacrificio de moitos anos o longo dunha dilatada traxectoria”.

Deste xeito, recibiron este recoñecemento como investigadoras e investigadores novos Moisés Cordeiro, Antía Fernández, Iria González, Andrés Justo, Javier Grandío, Raúl Barciela e Sofía Suárez. Os docentes mellor valorados polo alumnado foron Emilio Estévez, Javier Martínez, Miguel Ángel Gómez, Joaquín Collazo, Alba López, Gema Álvarez e Carlos Garrido. O PAS distinguido foi Mª del Sol Amorín, Julia Mencía e Mª Jesús Rodríguez. Finalmente tamén recibiron un recoñecemento as e os docentes que compren 30 anos de antigüidade na escola: o vicerreitor José Luis Míguez; Manuel Ángel Prieto, José Carlos Troncoso, Juan José Rodríguez, María del Carmen Pérez, Jorge Cerqueiro, Antonio Collazo, Xosé Manuel López, Antonio Fernández, José Fernando Manzanedo, Bernardino Novo, Mª Elena Albo, Amador Rodríguez, José Ignacio Armesto, Mª Emma Delgado, Alejandro Pereira e José Luis Diéguez.

Ademais, tamén se fixo un recoñecemento ao alumnado do centro polo seu esforzo e capacidade de adaptación nestes dous últimos anos marcados pola pandemia.