Un centenar de persoas participa no XXXIX Campionato nacional de fútbol sala de PAS

Desde este luns e ata o sábado, o campus de Ourense acolle a celebración do XXXIX Campionato nacional de fútbol sala de persoal de administración e servizos (PAS) universitario. A cita reúne a arredor dun centenar de traballadores de dez universidades españolas que este martes pola tarde foron recibidos por representantes da UVigo e do Concello de Ourense. 

Susana Reboreda, vicerreitora de Extensión Universitaria, e Xabier Rial, director técnico da Área de Benestar, Saúde e Deporte da Universidade de Vigo, foron os encargados de dar a benvida aos participantes no pavillón de deportes do campus de Ourense. Na súa intervención, a responsable institucional puxo en valor a longa tradición deste certame e o feito de que involucra nunha competición deportiva non ao alumnado universitario, como soe ser o habitual no contexto académico, senón ao persoal de administración e servizos. 

Agradecendo a participación nesta edición, os representantes da UVigo amosaron o seu desexo de que os participantes leven unha boa experiencia da súa visita á cidade e ao campus de Ourense, dos que destacaron o seu carácter acolledor. Na recepción tamén houbo unha homenaxe a dous PAS falecidos que habitualmente participaban neste campionato. Tras a recepción nas instalacións universitarias, os participantes desprazáronse ao Liceo de Ourense, onde foron á súa vez recibidos por Armando Ojea, tenente alcalde da cidade de Ourense.  

A final, o sábado

Este torneo xorde en 1982 da man dun colectivo do PAS das universidades de Estremadura e de Granada co obxectivo de unir lazos profesionais e de amizade a través da celebración dunhas xornadas lúdico-deportivas. A iniciativa tivo éxito e en 1983 organizouse o primeiro campionato de fútbol sala coa participación do persoal de administración e servizos destas dúas universidades, ás que se foron sumando outras institucións académicas españolas nos anos posteriores. A organización do campionato é rotatoria, sendo a primeira vez que se celebra no campus de Ourense, aínda que non na Universidade de Vigo. A cita, ademais do seu interese deportivo, ten o interese de que permite convivir durante unha semana a persoal de administración e servizos de dez institucións académicas estatais e dálles a oportunidade de coñecer o campus anfitrión cada ano.

Nesta edición participan no campionato, ademais da UVigo, equipos das universidades de Santiago de Compostela, Illes Balears, Granada, Cádiz, Oviedo, Almería, Murcia, La Laguna e Alacant. Os partidos celébranse no pavillón de deportes do campus, en horario de mañá, e réxense polas regras da Liga Nacional de Fútbol Sala, aínda que con algunhas particularidades. O sistema de xogo consiste nunha fase previa de dous grupos de cinco equipos, en sistema de liga a unha volta, que se desenvolve de luns a venres. Xa o sábado 10, ás 11.00 h, terá lugar a final, na que se enfrontarán os equipos clasificados en primeiro lugar de cada grupo para acadar o primeiro e segundo posto. Ás 12.30 h terá lugar a entrega de premios e clausura do campionato.