DUVI

Logo DUVI

Diario da Universidade de Vigo

Este venres celebráronse en Vigo, o luns serán en Ourense e o mércores en Pontevedra

Un cento de docentes dos tres campus participan nunhas xornadas sobre transferencia de resultados da I+D+i

A idea é pórse ao día sobre as vías que teñen para achegar os resultados dos seus traballos

Etiquetas
  • Estudantes
  • PAS
  • PDI
  • Vigo
  • Divulgación
  • Institucional
D. Besadío DUVI 12/07/2019

Como se fai unha patente, cales son os requisitos que ten que considerar un investigador ou investigadora para poder protexer os resultados das súas investigacións, que é un secreto empresarial, como se arma un contrato, cal é o proceso para crear unha spin-off… Estes son algún dos temas que se están a tratar nas Xornadas A xeración de valor a partir da I+D, unha actividade organizada pola Vicerreitoría de Transferencia, en colaboración coa oficina de I+D, co obxectivo de axudar a difundir e promocionar as diferentes ferramentas e vías coas que conta a comunidade investigadora para facilitar o tránsito efectivo dos coñecementos xerados desde a Universidade cara á sociedade.

As xornadas vanse celebrar nos tres campus. Este venres arrancaron en Vigo con dúas sesións: unha no Edificio de Ciencias Experimentais e, outra, na Escola de Enxeñaría de Telecomunicación. O luns continuarán no Edificio de Ferro do campus de Ourense e o mércores 17 en Ciencias da Educación e do Deporte de Pontevedra, ambas sesións de 11.00 a 12.30 horas. En total inscribíronse nas xornadas preto dun cento de docentes: 44 no campus de Vigo, 29 en Ourense e 18 en Pontevedra.

“É posible facer transferencia desde calquera dos ámbitos”

“Decidimos organizar estas xornadas para intentar que as e os investigadores se animen a tentar conseguir o sexenio de transferencia, pois hai moitos docentes que aínda non teñen na súa dinámica do día a día facer transferencia e pensamos que este tipo de actividades poden ser un estímulo para que vexan que é posible facer transferencia desde calquera dos ámbitos que existen na Universidade”, explica a vicerreitora de Transferencia, Mª Consuelo Pérez, que insistiu na idea de que se pode facer transferencia desde calquera ámbito. “Evidentemente desde o ámbito tecnolóxico é desde o que máis transferencia se fai, seguido do xurídico-social, pero noutros como o científico aínda custa, non por falta de coñecemento ou capacidade, senón simplemente pola falla de hábito á hora de sentarse a negociar cunha empresa”, recalcou a vicerreitora.

A idea é achegar a Vicerreitoría de Transferencia, e máis concretamente a Oficina de I+D aos investigadores/as e amosarlles as vías que teñen para achegar os resultados dos seus traballos á sociedade, especialmente ás empresas -contratos de I+D, proxectos de I+D colaborativa, protección de resultados e explotación dos mesmos a través de licenzas ou creación de SpinOffs-, así como as vías de tramitación e procedementos dos que dispoñen. A maiores outro dos obxectivos é presentar os servizos de asesoramento e acompañamento que se prestan desde a OTRI para tratar de facilitar o traballo á comunidade investigadora e animala a facer transferencia.