Ciencias Empresariais e Turismo achégase ás claves do establecemento de prezos en produtos e servizos

Este luns o curso académico 2018/2019 arrancou nas aulas do campus de Ourense con diferentes actividades, como actos de benvida ou presentacións de materias. Tamén deu inicio a programación á que o alumnado ten acceso fóra do currículo académico e que se prolonga durante todo o curso con todo tipo eventos, desde conferencias ata congresos. Así, a Facultade de Ciencias Empresariais e Turismo celebrou a conferencia A percepción dos prezos dos produtos e servizos, ofrecida por Jorge Pelegrín, profesor da Área de Comercialización e Investigación de Mercados da Universidad de La Rioja.

O acto extra-académico, coordinado polo profesor do centro José Antonio Fraiz, foi o primeiro aberto ao público interesado que se celebra no centro. Ante un público composto maioritariamente por profesorado aínda que tamén con presenza de alumnado, Jorge Pelegrín ofreceu unha sesión na que intentou debullar para as e os asistentes as claves que guían a determinación dos prezos por parte das empresas. “O prezo é unha variable un pouco estraña. Aféctanos aos consumidores en positivo, como sinal de calidade do produto, pero tamén en negativo, como indicativo do sacrificio que vamos a facer para telo”, comentou o profesor. Por este motivo, o seu establecemento, sinalou, supón “un xogo” no que a psicoloxía ocupa un papel fundamental.

A asimetría de información

“O vendedor sabe o que vende pero os compradores non teñen tan claro que é o que están a mercar”, explicou Jorge Pelegrín. Esa “asimetría de información”, apuntou, é a que permite ás empresas manipular os prezos para obter os beneficios necesarios, para ter a marxe de beneficios que buscan. Coa chegada de Internet e a posibilidade de que as e os consumidores comparen prezos e produtos, esta asimetría, sinalou o profesor, “diminuíu pero segue existindo”. A pesar de toda a información e valoracións dispoñibles na rede, lembrou, que a ou o comprador teña a percepción de que fixo “a mellor compra” segue a ser un reto tanto para consumidores como para empresas.

Como exemplo das dificultades para o establecemento dos prezos de produtos e servizos, o docente puxo como exemplo práctico o prezo dun bolígrafo que se merca nunha tenda no centro dunha cidade. Se se lle pregunta a un grupo de estudantes que estimen o seu prezo, dixo durante a súa visita a Ciencias Empresariais e Turismo, a cifra que se marque “para uns será cara e para outros barata”. Para entender estas diverxencias, ao longo da súa intervención Pelegrín explicou algúns dos conceptos e das claves no establecemento de prezos e na súa percepción, como os prezos de referencia, os prezos agardados, os limiares a partir dos cales un produto se considera que é caro ou barato ou a dinámica de establecemento das ofertas.

O concepto de prezo, recalcou na súa intervención ante o público asistente, “é complexo e multidimensional” e son diferentes os camiños existentes para “xogar” con el, para modificalo. O éxito das empresas que incluso en época de crise económica conseguen aumentar as súas vendas, apuntou Jorge Pelegrín, está en que “comprenden os prezos e coñecen a segmentación dos consumidores”, adaptándose aos seus segmentos e non intentando que os segmentos se adapta a eles. Así, lembrou, crise económica non é igual nin a caída das vendas nin a venda de produtos de baixo prezo.