DUVI

Diario da Universidade de Vigo

Día Mundial da Arquitectura

As construcións do campus convértense nun museo para os vigueses

Os autores dos edificios explican os seus proxectos aos cidadáns

Etiquetas
  • Vigo
  • Cultura
Jorge F DUVI 01/10/2007

A conservación do medio natural, a creación de espazos de interrelación para os estudantes e a procura da unión entre os centros. Estas son algunhas das preocupacións que guiaron a construción do campus universitario de Vigo e ás que se achegaron os cidadáns que participaron no “Día Mundial da Arquitectura”. Con motivo desta celebración, a delegación local do Colexio Oficial de Arquitectos de Galicia (COAG) organizou visitas guiadas polas infraestruturas da Universidade no campus de Lagoas – Marcosende.
“Dende a primeira edificación, no ano 1972, as construcións viviron diferentes fases”, lembraba o vicerreitor de Planificación. José Cidrás recibiu aos visitantes e explicoulles os principais fitos arquitectónicos do complexo universitario, dende os anos 80, “nos que parecía que habería un grupo de edificios nunha estrada”, ata o momento actual, “no que buscamos crear unha unidade de convivencia para a docencia, a cultura, a investigación ou o deporte”, especialmente a partir do proxecto de reorganización levado a cabo por Enric Miralles.
“Dende ese día búscase que os vigueses vos apropiedes do campus e que se converta nun signo de identidade para a cidade, porque neste momento os edificios son moi recoñecidos internacional pero non se identifican con Vigo”, explicaba aos participantes María Leboreiro, comisaria da exposición sobre o campus que a COAG organiza na Casa das Artes.

Percorrido polo campus

Estudantes, maiores e persoas de todas as idades compuxeron o primeiro grupo que visitou o campus. Acompañados por arquitectos e membros da COAG, os participantes coñeceron de primeira man as características dos edificios e a intencionalidade dos autores.
A ruta comezou pola Escola Técnica Superior de Minas. O arquitecto Gabriel Santos Zas, creador do proxecto, expuxo as circunstancias que marcaron o seu deseño, “como a complicada orografía e a necesidade de que o edificio actuara como unión das escolas de Industriais e Telecomunicacións”.
“Para os alumnos ten que ser como ir de excusión cada día”, expresaba unha das asistentes asombrada pola arquitectura do campus, ao tempo que unha estudante felicitaba a Santos Zas “pola súa funcionalidade e a axeitada adecuación ao entorno”.
Pola súa banda o arquitecto Xosé Rodríguez explicaba aos visitantes dende a cuberta da Biblioteca Central como “cada zona do campus está dedicada a un dos catro ámbitos do coñecemento”. Ao mesmo tempo que sinalaba a localización na que se están construíndo os diferentes módulos de CITEXVI. “A sociedade actualmente demanda I+D e sinerxia co mundo empresarial, polo que debemos situar estas instalacións no corazón do campus”.
Os visitantes continuaron ao longo da xornada achegándose ás diferentes instalacións do campus. A Cidade Universitaria, a Reitoría e a Facultade de Ciencias Xurídicas convertéronse nun museo no que os participantes coñeceron a arquitectura e os espazos nos que se desenvolve o principal labor docente e investigador na cidade de Vigo