“O desenvolvemento dos servizos sociais abre un amplo nicho de emprego público”

“Coa futura conversión dos servizos sociais en prestacións universais, ábrese un amplo nicho de emprego público que se desenvolverá totalmente nos próximos oito anos e que dará ocupación a miles de titulados universitarios”. Con estas verbas, Lois Pérez Castrillo, xerente do Consorcio Galego de Servizos de Igualdade e Benestar, animou aos estudantes presentes nas xornadas do Forumemprego a prepararse para desenvolver o seu futuro profesional no eido do emprego público, xa que tal como afirmou “proporciona seguridade e mellores condicións profesionais ao recoñecer os dereitos laborais dos empregados”.
“O perfil dos traballadores que os servizos sociais demandan é o de unha persoa con titulación media ou superior, e dentro disto abarca psicólogos, pedagogos, traballadores sociais, mestres, terapeutas ocupacionais e licenciados en dereito...”, continuou Pérez Castrillo, ex-alcalde de Vigo. Ademais da formación especializada, un requisito indispensable co que deben contar os empregados deste sector é a sensibilidade social, xa que se trata dun ámbito onde os erros se pagan moi caros, co rexeitamento social.
En canto ás políticas de benestar que se están a deseñar, o xerente sinalou que responden á necesidade que a nosa comunidade ten de vencer o déficit histórico en canto a servizos para nenos, maiores e para aqueles que por calquera motivo quedan excluídos da sociedade Como exemplo destas medidas sinalou a Lei de Dependencia, que está sentado as bases para a xeración de emprego público nun sector que ata o momento estaba en mans de entidades privadas.

A conselleira Eures do Servizo Público de Emprego de Noruega: “Precisamos incorporar traballadores altamente cualificados”

Co obxectivo de animar aos futuros titulados da Universidade a desenvolver o seu futuro profesional en Noruega, a conselleira Eures do país nórdico, Ragnhild Synstad, fixo, no marco do Forumemprego, unha exposición sobre as condicións de vida e traballo na rexión. “A taxa de desemprego en Noruega é extremadamente baixa, situándose no mes de xaneiro entorno o 1,8% da poboación, o que supón unhas 44.670 persoas”, afirmou, engadindo que “a principal dificultade para a inserción no mercado laboral nórdico é o idioma, xa que existen dúas linguas escritas oficiais, o noruegués estándar e o moderno, ademais de múltiples dialectos.
Os principais sectores nos que Noruega ten necesidade de incorporar traballadores altamente cualificados son, entre outros, “a industria mecánica, as obras públicas e navais, o ámbito da bioloxía e a saúde e os sectores do gas e do petróleo”, segundo sinalou Synstad. Só no eido da construción e das obras publicamos precisamos tamén man de obra sen especialización.
Para finalizar, a conselleira Eures sinalou que “a previsión é que para o 2010 se precise recrutar noutras rexións a preto de 220.000 persoas para cubrir o crecente desenvolvemento do país”

Clausura do Forumemprego 2008

Para completar a xornada, ademais de Pérez Castrillo e Ranghild Synstad, houbo representantes do terceiro sector e da empresa privada, destacando a presenza de Pilar Álvarez, xerente de Alborada; Sonia Viñas, coordinadora da Fundación Universia; Clara de Lorenzo, xefa de recursos humanos de Gadisa e Francisco Carneiro, director de xestión de activos do Banco Portugués de Investimento.
Tralo acto de clausura do Forumemprego no campus vigués, a continuación tócalle a quenda a Pontevedra, onde as xornadas se desenvolverán hoxe e mañá, e a Ourense, que recibirá a visita dos conferenciantes o xoves e venres.