Do 10 ao 12 de marzo en versión dixital e retransmitido por Youtube
Docentes da Facultade de Filoloxía e Tradución coorganizan un simposio sobre feiras internacionais do libro
Buscan mellorar o coñecemento destes encontros como instrumentos de promoción cultural
Guadalaxara, Bos Aires, Frankfurt, Madrid... son cidades coñecidas, entre outras moitas cousas, polas súas feiras internacionais do libro, lugares de encontro, literario, cultural, económico e mesmo político. O grupo de investigación Bitraga da Facultade de Filoloxía e Tradución, composto polas profesoras Iolanda Galanes, Ana Luna, Silvia Montero e Áurea Fernández, forma parte do comité organizador dun simposio internacional que arranca este mércores en Santiago de Compostela e no que, precisamente, se busca mellorar o coñecemento destes eventos como instrumentos de promoción cultural, afondando na figura do ‘convidado de honra’ e na súa función como escaparate para a promoción da lectura dun determinado país no exterior.
O simposio prolongarase ata o venres 12 e, dadas as actuais circunstancias sanitarias, vaise levar a cabo de xeito exclusivamente dixital, de maneira que as diferentes conferencias, relatorios e mesas redondas serán emitidos a través da web da entidade colaboradora, Consello da Cultura Galega e da súa canle de Youtube. O encontro reunirá especialistas académicos/as de prestixio internacional que exporán diferentes perspectivas relacionadas cos estudos da cultura. En concreto, abordaranse neste simposio varias ferias internacionais do libro (Liber Madrid-Barcelona, Livre Paris, Feira Internacional do Libro de Guadalaxara, Feira Internacional do Libro de Bos Aires e Frankfurter Buchmesse) desde a perspectiva dos estudos da cultura, a socioloxía da tradución e a economía da cultura cun equipo pluridisciplinar e internacional.
Entre este equipo de especialistas, as investigadoras da UVigo destacan a participación do antropólogo cultural arxentino Gustavo Sorá, da Universidad Nacional de Córdoba, e da francesa Gisèle Sapiro, do Centro Europeo de Socioloxía e Ciencias Políticas, pero o programa de ponentes é extenso. Desde España participan docentes das tres universidades galegas e de Madrid CUNEF; desde Francia, da Paris Sorbonne-Paris IV; desde Brasil, da Univ. Federal do Rio de Janeiro, do Centro Federal de Educação Tecnológica de Minas Gerais e da Universidade Federal de Uberlândia; desde Alemaña, da Universidade de Flensburg, e do Reino Unido da Universidade de Warwick.
Presentación das conclusións do proxecto Culturfil
O simposio sirve tamén como escenario de honra para presentar as conclusións do proxecto de investigación Culturfil, Nuevas estrategias de promoción cultural. Las feriras internacionales del libro y la condición de invitado de honor, financiado pola Axencia Estatal de Investigación do Ministerio de Ciencia e Innovación e por fondos Feder, coordinado pola Universidade de Santiago de Compostela e do que tamén forman parte as investigadoras do grupo Bitraga. “O evento dá seguimento a outras actividades do proxecto celebradas moitas delas na Universidade de Vigo e que se poden consultar na súa páxina web”, explica Galanes.
O programa do encontro arrancará ás 16.00 horas e, tras a apertura, terá lugar a conferencia Os festivais literarios internacionais. Primeiros resultados, a cargo de Gisèle Sapiro. Presentará a profesora da Universidade de Vigo Áurea Fernández, quen tamén moderará a posterior mesa redonda, centrada nos diferentes parámetros de internacionalización e na que participarán María Fernández Moya, do Colexio Universitario de Estudos Financeiros, Cunef; Carmen Villarino, da Universidade de Santiago de Compostela, e as profesoras da UVigo, Iolanda Galanes e Ana Luna. Rematará esta primeira xornada cun relatorio sobre a promoción institucional nas feiras internacionais do libro, do que se encargará Cristina Rubal, subdirectora xeral de Bibliotecas e do Libro da Xunta de Galicia.