DUVI

Diario da Universidade de Vigo

As exhibicións na Vicerreitoría completaranse con 200 pases para ver os documentais en internet

‘Docs del Mes’ combinará as proxeccións presenciais coa visualización dos filmes a través da rede

A programación retómase este luns con ‘Lo que no te mata...’

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Pontevedra
  • Cine
  • Saúde
  • Cultura
DUVI Pontevedra 22/01/2021

Da man da Vicerreitoría do campus, Pontevedra é desde 2018 unha das máis de 70 cidades integradas na programación de Docs del Mes, un ciclo de cinema documental coordinado pola compañía Parallel 40, que programa cada ano a proxección de dez filmes nas súas diferentes sedes. As limitacións de aforo ás que obriga a situación sanitaria provocada pola covid-19 motivan que a programación deste ciclo na cidade vaia combinar este ano a exhibición dun filme cada mes coa posibilidade de ver estes documentais a través da rede. Para cada proxección, a Vicerreitoría disporá de 200 “prazas” para a súa visualización online nos 15 días seguintes á exhibición do filme.

A programación de Docs del Mes neste 2021 arrinca en Pontevedra o vindeiro luns coa proxección ás 19.00 horas na sede da Vicerreitoría do documental, Lo que no te mata..., da directora belga Alexe Poukine. Dada a situación sanitaria, a sala terá un aforo limitado a 15 persoas, pero outras 200 poderán ver o filme, desde a xornada seguinte á súa proxección e durante os seguintes 15 días, a través da web da produtora organizadora. Para iso, deberán remitir un correo electrónico a docspon@uvigo.es, indicando no asunto 'docs del mes' e se lles enviará un código numérico, de uso unipersoal e ligado á conta de correo, que lles permitirá acceder ao documental. Estes 200 'pases', explican desde a Vicerreitoría, outorgaranse, para cada un dos filmes, seguindo a orde de solicitude, a partires do día seguinte á proxección presencial.

As tres primeiras citas de 2021

A historia de Ada, unha muller que con 19 anos foi violada tres veces na mesma semana por un home que coñecía constitúe o punto de partida de Lo que no te mata..., un documental que buscar contribuír á visualización, como sinalan desde a produtora, dun “fenómeno social moi amplo e aínda silenciado”, as violacións en contornas de confianza. Dirixido por Alexe Poukine, o filme acumula seis premios e a súa selección en máis dunha trintena de festivais desde a súa estrea en 2019.

O 15 de febreiro proxectarase, tamén na sede da Vicerreitoría, Advocate, un documental dirixido pola estadounidense Rachel Leah Jones e o francés Philippe Bellaiche e centrado na traxectoria de Lea Tsemel, unha avogada israelí “especializada na defensa de prisioneiros políticos palestinos”, salientan desde a produtora. O filme, que formou parte da shortlist dos Oscar, estréase en febreiro en España no marco de Docs del Mes e afonda na figura de Tsemel a través da súa preparación das defensas de dous casos, o dun neno de 13 anos acusado de participar no acoitelamento dun mozo israelí e o dunha moza acusada dun “intento frustrado de atentado suicida”. 

Un mes despois, o 15 de mazo, a programación continuará con The Letter, unha película dirixida por Maika Lekov e Christopher King, que narra a historia de Karisa, un mozo keniano que retorna a súa aldea natal cando sabe do perigo que atravesa a súa avoa tras ser acusada de bruxería, un problema que sofren neste país “centos de anciáns”.