Realizado en colaboración coa Universidade de Vigo, comezará o vindeiro luns
O encontro “Eduardo Barreiros” fomentará o espírito emprendedor entre a mocidade
Co fin de xerar un foro aberto para o debate, a análise e o intercambio de ideas e experiencias emprendedoras, así como de promover iniciativas empresariais na mocidade, o Concello de Ourense, a través da Concellería de Economía e Facenda, Emprego e Promoción Económica pon en marcha o Encontro Internacional de Emprendedores Eduardo Barreiros. Na súa organización interveñen tamén a Fundación Eduardo Barreiros e o Instituto Galego de Promoción Económica, ademais de colaborar outras moitas entidades entre a que se atopa a Universidade de Vigo.
Os obxectivos principais do encontro, que terá lugar entre os días 16 e 18 de xuño no Auditorio Municipal e no Liceo Recreo, son fomentar o espírito emprendedor , crear un espazo para que os empresarios intercambien coñecementos, información e experiencias e ademais poidan descubrir novas oportunidades de negocio. Pero aínda que está dirixido fundamentalmente a persoas emprendedoras, tamén conta entre o seu público obxectivo con cargos de entidades públicas e privadas con competencias nas áreas de fomento de creación de empresas e de autoemprego, así como con membros da comunidade escolar e universitaria, como potenciais empresarios que hai que motivar.
O programa, que conta con destacados relatores a nivel internacional, atópase articulado en tres liñas básicas. Por unha banda, as iniciativas que actualmente se están a levar a cabo para o fomento da mentalidade emprendedora, por outra as experiencias de emprendemento en diferentes eidos, e ademais, é tamén unha achega entre empresarios de Ourense que traballan no exterior.