Enxeñaría Informática acollerá unha nova edición do campamento tecnolóxico para a rapazada Aldaba-TIC

A Escola Superior de Enxeñaría Informática do campus de Ourense acollerá do 22 ao 26 de xuño unha nova edición do campamento tecnolóxico de verán destinado á rapazada Aldaba-TIC Camp. O seu obxectivo é “espertar vocacións tecnolóxicas en mozas e mozos en idades temperás, darlles a coñecer o mundo TIC e axudarlles a desenvolver habilidades técnicas dun xeito divertido”. O período para solicitar unha praza está aberto ata o 24 de maio. 

A actividade está organizada pola Cátedra Aldaba WIB: Women, ICT & Business, iniciativa das universidades de Vigo e A Coruña e da empresa Aldaba, celebrándose na cidade herculina un campamento similar. O campamento está destinado a nenas e nenos de 6 a 12 anos “con interese pola tecnoloxía e ganas de explorar todo o que pode ofrecer”. Baixo o lema Aventura STEM: Viaxe no Tempo, “cada participante mergullarase nunha experiencia educativa na que historia e innovación xúntanse para resolver retos do pasado con ferramentas do futuro”. A través dunha metodoloxía lúdica e práctica, “o alumnado explorará áreas clave do ecosistema dixital actual: drones, robótica, deseño e impresión 3D, programación, IA e ciberseguridade”. 

O campamento sigue unha metodoloxía activa que busca o desenvolvemento dunha serie de competencias en cada participante, concretamente as competencias dixitais, a competencia en matemáticas en ciencia, tecnoloxía e enxeñaría, aprender a aprender e sentido da iniciativa e espírito emprendedor. A idea é, indican desde a organización, que o alumnado que participe non só adquira competencias técnicas, senón que tamén forxe novas amizades nunha contorna colaborativa e creativa. “É unha opción ideal para seguir aprendendo dunha forma diferente durante os meses de verán”, sinalan. 

Seguindo o compromiso da Cátedra Aldaba WIB de reducir a fenda de xénero no sector tecnolóxico, o 80% das prazas deste campamento están reservadas para alumnas. “Con esta medida, búscase incentivar activamente o interese das nenas polas disciplinas STEM (ciencia, tecnoloxía, enxeñaría e matemáticas) desde idades temperás, facilitando un acceso equitativo a esas profesións”, comentan desde a actividade. A tarifa total (madrugadores e comedor excluídos) é de 99 euros (susceptible de ser parcialmente subvencionado).