O Campus Universitario Ourense RC gañou ao Babyauto Zarautz RT
O equipo de rugby consegue a súa primeira vitoria fóra da casa
Con este resultado sitúase terceiro de grupo da división de honra B estatal
O Campus Universitario Ourense Rugby Club acadou este domingo a súa primeira vitoria fóra da casa desta tempada. O equipo gañou 14-22 na súa visita ao Babyauto Zarautz RT. Con este resultado o equipo universitario sitúase terceiro do seu grupo na división de honra B do rugby estatal. Tamén este domingo arrancou a competición na liga galega para o Club Natación Escualos Campus da Auga.
Partido disputado
“Por fin chegou a primeira vitoria fóra de casa da tempada. Tras unha longa viaxe ata terras donostiarras, o equipo puido gañar un partido ante un equipo duro asentado nesta categoría. O terreo de xogo estaba bastante brando pero iso non impediu ao Campus xogar un partido serio e ben traballado”, comentan desde o Campus Universitario Ourense Rugby Club. Foi, sinalan, un partido moi disputado no que o Babyauto Zarautz RT “nunca baixou a garda” e no que o “Ourense non se amedrentou”, decantándose a vitoria final paro o equipo galego. Con esta vitoria, o Campus Universitario Ourense Rugby Club suma catro vitorias e dúas derrotas no que vai de tempada.
Inicio da liga galega de natación
Tamén este domingo comezou a tempada de natación master coa celebración da primeira xornada de liga galega. A competición desenvolveuse en dúas sedes, a piscina de Ponteareas e a piscina municipal de Monforte de Lemos. O Club Natación Escualos Campus da Auga presentou a 22 nadadores e nadadoras e foi o equipo máis numeroso na sede de Monforte. “Non houbo ningunha descalificación e todos os nadadores fixeron grandes probas tendo en conta que a tempada acaba de comezar. Á espera dos resultados e do cálculo de puntos, estimamos que estaremos na parte alta da clasificación provisional”, comentan desde o club.