DUVI

Diario da Universidade de Vigo

O primeiro equipo do club universitario pechou cun 3-3 a súa visita ao Xadrez Ourense

A Escola Xadrez Pontevedra-UVigo suma un empate na casa do vixente campión

Este resultado sitúao cuarto na clasificación da División de Honra

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Pontevedra
  • Deportes
  • Transferencia
DUVI Pontevedra 13/03/2023

Na terceira xornada da Liga Galega de Xadrez, na súa División de Honra, o primeiro equipo da Escola Xadrez Pontevedra-Universidade de Vigo afrontou unha das súas saídas máis complicadas da tempada, a súa visita ao vixente campión galego, o Xadrez Ourense. No seu enfrontamento cun equipo “cunha nómina de titulados internacionais moi superior a calquera dos outros clubs galegos”, como salientan desde o equipo universitario, o EXP-UVigo Xadrez. Estratexia pola Paz logrou un empate a tres que, pese a ser un “bo resultado”, deixou un sabor “agridoce” aos visitantes, que viron como nos últimos intres se lle escapaba a vitoria global.

O enfrontamento arrancou, de feito, cun triunfo dos universitarios, o que Rubén Fernández lograba pola vía rápida fronte ao mestre Fide David Gómez. A continuación, chegaba o primeiro punto para o equipo local, de mans da campioa de España feminina, a mestra internacional Yudania Hernández, que vencía a Juan Martínez Montes no seu debut co primeiro equipo da EXP-UVigo. Non obstante, os dous seguintes taboleiros en pecharse deixaban ao club universitario moi preto do triunfo final, grazas ás vitorias acadadas por Pablo García e David García. Mais, finalmente, os visitantes non puideron puntuar nos dous enfrontamentos pendentes de concluír, nos que Alberto Portela caeu derrotado na “partida tola da xornada” e o mestre internacional Daniel Rivera víase lastrado por “dúas malas xogadas” no treito final. 

Tras este resultado, o equipo pontevedrés sitúase no cuarto posto da táboa clasificatoria, con 9,5 puntos, os mesmos que Xadrez Rianxo e Círculo Ferrolano, e tres menos que o novo líder, o Benchosey de Pereiro de Aguiar. A vindeira fin de semana, o primeiro equipo do club universitario recibirá ao Liceo Ourense na Facultade de Ciencias da Educación e do Deporte.

Nas restantes categorías da Liga Galega, os equipos da EXP-UVigo só puideron sumar un segundo triunfo, o logrado polo EXP-Zona Informática fronte aos seus compañeiros do EXP-Chess Cares, en Terceira División. En primeira, o Ramón Escudeiro Tilve caía derrotado na casa do Xadrez Marín, mentres que, en segunda, o EXP-Non a violencia de xénero sitúase en postos de descenso tras caer 4-0 fronte ao filial do Xadrez Fontecarmoa de Vilagarcía.