As Escolas Deportivas presentan unha oferta ampla e vangardista

Adaptándose aos novos tempos e tendencias dentro do eido da actividade física, as Escolas Deportivas presentan neste comezo de curso unha oferta ampla e renovada. Un ano máis, con esta iniciativa a Servizo de Deportes pretende achegar á comunidade universitaria un amplo abano de posibilidades de facer exercicio físico ao tempo que fomenta un xeito saudable de ocupar o tempo de lecer.
Este programa de actividades, que se desenvolve nos tres campus de universidade, adoita reunir ao longo do curso a preto de 2000 usuarios repartidos en clásicos como o ioga, o aeróbic ou a natación ou a partir de agora en novidades como o muay-thay boran, o fitgym ou o fitball-pilates.
A matrícula para calquera das actividades está aberta ata o vindeiro 19 destes mes de outubro para calquera membro da comunidade universitaria. Cada un deste programas ten unha duración cuadrimestral e poderá ser renovado no mes de xaneiro. O prezo varía segundo a modalidade pero as inscricións deben realizarse no Servizo de Deportes en calquera dos tres campus.
A oferta deportiva comprende dende bailes latinos ou orientais, ata natación, aeróbic, vela, iudo, ioga, pilates, step, taekwondo, tenis, xadrez, remo ou ximnasia de mantemento. Cada campus dispón dunha oferta diversificada e diferenciada dos outros, pero sempre actualizada de xeito que a comunidade universitaria poda practicar novas disciplinas e tendencias. Deste xeito, impartiranse clases de aero+tono+step, aerobox, aquagym, body pump, fitball, gap, hip hop, jiu jitsu+hapkido, kendo, spinning, wu shu sanda, wellnes... O Servizo de Deportes pretende así ofrecer a oportunidade a estudantes, PDI e PAS de achegarse a disciplinas deportivas ás que normalmente non teñen acceso, ademais dunha axeitada canle para adquirir hábitos saudables.
Na páxina web do Servizo de Deportes pódese consultar a oferta completa por campus, así como os prezos e o lugar onde se impartirán as clases.