Unha exposición e unha mesa redonda para achegar á cidadanía a esquerda heterodoxa galega na Segunda República

“Esta exposición pretende reunir unha pequena pero significativa historia de militantes da esquerda heterodoxa galega, aos que podemos cualificar con razón como dobremente esquecidos Sufriron a represión franquista como militantes de esquerdas, moitos deles pagándoa coas súas vidas e, ao mesmo tempo, o estalinismo foi tan cruel como, ou incluso máis que os primeiros; ademais do encarceramento ou asasinato, sufriron unha campaña de calumnias acusándoos de ser axentes de Hitler”. Así explica Jacobo Bermejo, membro da Fundación Andreu Nin e comisario da mostra A esquerda heterodoxa galega na Segunda República. 90 aniversario da fundación do POUM, o que as persoas que a visiten atoparán entre o 4 de o 26 de marzo no Edificio Redeiras da UVigo.

Organizada polas fundacións Eugenio Granell, Andreu Nin e 10 de Marzo, coa colaboración da Vicerreitoría de Extensión Universitaria da UVigo, a exposición está integrada por unha decena de paneis explicativos, a través dos que, e baseándose na obra de Dionisio Pereira, “buscamos rescatar do esquecemento un grupo de militantes experimentados que foron os que alzaron a voz contra o poder do todo poderoso Stalin, ao tempo que ofrecen un modelo para un partido socialista democrático”, explica Bermejo.

Dar a coñecer como se formou o POUM

A mostra chega a Vigo logo de visitar outros puntos de Galicia, meses despois de cumprirse o 90 aniversario da fundación do Partido Obrero de Unificación Marxista (POUM), unha efeméride que os organizadores da mostra queren aproveitar para dar a coñecer como se formou este partido e cal foi o seu legado político.

“Lonxe de ser historia pasada, os escritos dos seus principais líderes, Andreu Nin e Joaquín Maurin, seguen a ser publicados e estudados. O seu gran legado político foron, sen dúbida, as Alianzas Obreiras desenvolvidas durante o Bienio Negro da República, consolidando a unidade das forzas de esquerda contra os ventos fascistas que sopraban con forza naquel momento. Desafortunadamente, hoxe estes ventos volven soprar, como fixeron no pasado, substituíndo os xudeus por inmigrantes e calquera cousa que se poida parecer á diversidade”, lamenta Bermejo.

Considera o comisario da mostra que, aínda que o seu público obxectivo podería ser a xente interesada na memoria histórica e a política en xeral, “estaremos satisfeitos se esta exposición consegue sacar estes dous grandes temas do esquecemento e contribuír á reflexión sobre o significado do estalinismo e o desastre que a división polo fascismo trouxo a toda a esquerda europea”.

Unha mesa redonda o día da inauguración 

Previa á celebración dunha visita guiada á exposición, o 4 de marzo ás 19.00 horas, desenvolverase no edificio Redeiras unha mesa redonda na que participarán Dionisio Pereira, historiador; Enrique del Olmo, presidente da Fundación Andreu Nin; Victor Santidrian, membro da Fundación 10 de marzo; Jacobo Bermejo, comisario da exposición; e Susana Reboreda, vicerreitora de Extensión Universitaria. A continuación proxectarase un vídeo sobre a historia do POUM.