Un libro do Servizo de Publicacións da Universidade
“Física en Imaxes” achega a ciencia á vida diaria dos cidadáns
Finalista do certame nacional Ciencia en Acción
Algunha vez preguntastesvos por que se producen as pompas de xabón ou por que os columpios para bebés teñen esa forma tan peculiar?. As respostas a estas cuestións e a moitas outras son as que se poden atopar no libro Física en Imaxes, unha obra que pretende aproximar o lector a esta disciplina a través de imaxes cotiás, desentrañando os conceptos e aspectos físicos fundamentais que estas esconden.
Un dos autores do libro, Pío Manuel Fernández, explica que “a idea básica do libro é realizar un percorrido pola física a través dunha colección de imaxes diarias, de xeito que cada unha delas nos introduce ou ilustra un concepto; así, cando nos crucemos coa imaxe lembraremos ese concepto e pronto a compresión da realidade física irá transformando a forma de ver as cousas, case sen esforzo”.
Lonxe dos formatos habituais dos libros de física, unha das características de esta publicación é a súa orixinalidade. Publicado en tres idiomas (galego, español e inglés), a idea de facelo xurdiu a raíz de que Pío Fernández, profesor da EUET Forestal, utilizaba constantemente estes exemplos nas súas clases de física e un día decidiuse a materializalos nun libro coa intención de elaborar un material didáctico, alternativo e renovado. Moi satisfeitos co resultado obtido presentaron a publicación ao concurso Ciencia en Acción, certame nacional que, incluído dentro da Semana Europea da Ciencia e a Tecnoloxía, pretende achegar a ciencia ao gran público dun xeito sinxelo, atractivo e dinámico. Tras quedar finalistas na modalidade de Traballos de Divulgación Científica en Soporte Papel, o profesor comenta que “para a Universidade é un gran orgullo e para nos quedar finalistas é o mellor premio que nos puideron dar”.
Física para todos os públicos
En Física en Imaxes abórdanse os temas correspondentes a un programa tradicional de física xeral. En cada tema agrúpanse diversas imaxes de feitos cotiáns e realízase unha análise dos mesmos en dous niveis de dificultade. Nun primeiro nivel, máis básico, invítase ao lector a descubrir a física que se agocha nesa situación mediante a formulación dunha cuestión, un comentario breve ou un pequeno reto. Nun nivel máis avanzado introdúcese unha explicación cualitativa ou un pequeno cálculo a partir de leis fundamentais da física. Con este enfoque preténdese chegar a todos e estimular o coñecemento científico. Sobre todo vai dirixido a aqueles a quen a física lles produce pánico ou aburrimento, a outros, con máis coñecementos, quizais este libro lles quede pequeno ou o vexan incompleto, e sintan a necesidade de sacarlle máis substancia a algunhas imaxes ou de incorporar outras novas tamén próximas á súa realidade.