Investigadores de Belas Artes amosan as súas creacións en Islandia

Untitled Lullaby é o título da exposición que permitiu dar a coñecer na localidade islandesa de Akureyri o traballo dos artistas e investigadores da Facultade de Belas Artes Manuel Mata e Dennise Vaccarello. Ambos foron seleccionados para participar na Gil Artist Residency, un programa de residencias artísticas desenvolvido pola Gilfélag Society nesta localidade no norte de Islandia, o que levou a estes dous investigadores da facultade a traballar nas últimas semanas nas creacións que integran a exposición que o pasado venres se inauguraba na Deiglan Gallery como broche final á experiencia que ambos viviron neste país ao longo do último mes. 

“Islandia é un país que me parecía exótico e crin que estando na periferia da Unión Europea e servindo de ponte entre Dinamarca e Groenlandia sería un lugar moi diferente onde traballar”, salienta Mata, profesor e alumno de doutoramento da facultade pontevedresa, quen incide no interese que lle espertaba “sobre todo o contraste cultural e o clima extremo” deste país, onde “as horas de día son poucas e a clase de luz moi distinta á que estou acostumado”. Nunha liña similar, Vaccarello, tamén investigadora predoutoral e docente na facultade, incidía no seu interese pola paisaxe e o clima islandés. “Hai tempo que tiña gañas de visitar o país e unha residencia artística parecíame unha boa forma de viaxar e realizar obra nunha contorna diferente”, sinala. Deste xeito, ambos presentaron a súa candidatura a un programa de residencias fundado en 1991 e que ten como propósito promover a creatividade a través da interacción entre a contorna local de Akureyri, as e os artistas e as institucións culturais, programa polo que teñen pasado nos últimos meses creadores e creadoras procedentes de Rusia, Estados Unidos, Arxentina, Australia, Xapón ou Corea. 

Dúas propostas diferentes nun mesmo espazo

Ao longo das últimas semanas, Vaccarello e Mata, que xa expuxeran conxuntamente na Sala X de Belas Artes en 2016, desenvolveron, explican, dúas propostas artísticas independentes pero que, como acto final desta residencia, ían convivir nun proxecto expositivo, ao que deron o título de Untitled Lullaby. “O meu trabalo céntrase na fotografía instantánea e a escritura e o resultado é unha mestura das dúas cousas”, salienta Mata do proxecto que desenvolveu no marco dunha estadía na que, recoñece, a propia contorna na que se levaba a cabo “exerce xa un contraste o bastante intenso como para condicionar de maneira tallante un proxecto fotográfico”. 

Escultura, vídeo e fotografía, por outra banda, foron os elementos empregados por Vaccarello para “configurar unha paisaxe etérea” nesta exposición, inaugurada este venres na Deiglan Gallery, onde permaneceu só ata este domingo, como final a unha residencia da que esta artista e investigadora destaca “o feedback da xente” e que constituíu, engade, “unha experiencia enriquecedora en todos os aspectos”, que lle permitiu “ver as cousas desde outra perspectiva ao saír da túa zona de confort”.