As conferencias, organizadas polo grupo FAOC sucederanse ao longo do ano
Investigadores de Sao Paulo analizan a atmosfera nun ciclo de conferencias na Facultade de Ciencias
O conselleiro de Medio Ambiente asistiu á primeira sesión
Coa charla do doutor Tércio Ambrizzi do departamento de Ciencias da Atmosfera da Universidade de Sao Paulo inaugurouse o ciclo de conferencias organizado polo grupo de Física da Atmosfera e do Océano (FAOC) no ámbito do posgrao en Física Aplicada. Enmarcadas nesta iniciativa sucederanse ao longo de todo o ano no Politécnico as leccións climáticas impartidas por profesionais da investigación do ámbito a nivel internacional.
O obxectivo do proxecto é, segundo Juan Antonio Añel, un dos membros do grupo organizador, “poñer en valor a investigación que se está a facer en ciencias da atmosfera e do clima e mostrar as perspectivas actuais neste campo”. Aínda que as xornadas están abertas a todo o público interesado de xeito gratuíto, van dirixidas “a alumnos de Física e do grao superior da Facultade, así como aos que teñan curiosidade no tema” comentou Añel.
Relatores da Universidade de Sao Paulo
Nesta primeira sesión, á que acudiu o conselleiro de Medio Ambiente Manuel Vázquez, o doutor Ambrizzi abordou o tema da Climatoloxía Dinámica en Sudamérica dende unha visión xeral para achegar aos presentes aos sistemas climáticos en América do Sur. A súa compañeira na Universidade de Sao Paulo, Rosmary Rocha, encargouse de ampliar a información coa parte numérica dos traballos realizados dentro do seu relatorio Aplicacións do Modelo RegCM3 para Estudios Climáticos na América do Sur.A presenza destes dous investigadores brasileiros foi posible gracias ao programa de cooperación interuniversitaria favorecido por iniciativa do Ministerio de Educación e Ciencia entre o grupo da Universidade de Vigo e o departamento de Física Atmosférica da Universidade de Sao Paulo. A través del está previsto nos vindeiros anos o intercambio de investigadores para compartir experiencias así como de alumnos de doutorado.