Realizaron as probas na Escola de Enxeñaría de Minas e da Enerxía
Medio cento de estudantes de ensino medio participan no campus na fase galega da XIII Olimpíada de Xeoloxía
Participaron tamén nunha xincana xeolóxica en Monteferro, Nigrán
56 estudantes de 4º da ESO e 1º e 2º de bacharelato de oito centros da provincia de Pontevedra achegáronse este mércores á Escola de Enxeñaría de Minas e da Enerxía para participar nas probas correspondentes á fase galega da XIII Olimpíada de Xeoloxía, unha actividade educativa na que participan máis de 200 estudantes de toda Galicia e coa que se busca fomentar o interese do alumnado que en breve iniciará estudos universitarios polos contidos propios da Xeoloxía e do conxunto das Ciencias da Terra.
Procedentes do IES Ponte Caldelas; Mendiño, de Redondela; Ribeira do Louro, de Porriño; Primeiro de Marzo, de Baiona; Terra de Turonio, de Gondomar; San Paio, de Tui, e os centros vigueses de Beade e Teis, a xornada arrancou no vestíbulo da Escola de Enxeñaría de Minas e da Enerxía, onde foron recibidos pola directora, a profesora Elena Alonso quen foi a encargada de darlles a benvida.
Xincana, proba teórica, obradoiros...
Unha das actividades que espertou máis expectativas foi a xincana xeolóxica, proba para a que se desprazaron ata Monteferro en Nigrán, onde tiveron a oportunidade de observar de observar diferentes tipos de minerais, petroglifos, etc. De volta na escola, a primeira hora da tarde realizarase a proba teórica e, xa despois, poderán disfrutar de diferentes actividades guiadas organizadas especialmente para eles desde a EEME, tal e como lles explicou Raquel Pérez, responsable de divulgación científica da escola. Impartidos por persoal investigador, nesta ocasión organizáronse dous talleres: Paleontoloxía 3D, a cargo dos investigadores Bienvenido Díez e Iván Rodríguez, do grupo de Análise de Concas Sedimentarias; e The Wall, da man de María Araújo e Xurxo Rigueira, do Grupo de Xestión Segura e Sostible dos Recursos Minerais.
En quenda de tarde e divididos en dous grupos, guiados polas investigadoras Raquel Pérez e Paula Vázquez, todos os estudantes terán a oportunidade de participar en ambos obradoiros e poder facerse así unha idea da importancia da Xeoloxía para a preservación do medio natural, a xestión racional dos recursos ou a adopción de medidas ante impactos e riscos xeolóxicos.
A final nacional será o 25 de marzo en Jaen
A publicación de resultados e entrega de premios está prevista para esta mesma tarde, arredor das 17.45 horas no vestíbulo da escola. As persoas que acaden a máxima cualificación en cada sede territorial pasarán á Fase Española, convocada polo Colegio de Geólogos, a Sociedad Geológica Española e a Asociación Española para la Enseñanza de las Cienicas de la Tierra. Será o día 25 de marzo en Jaén e de aí sairá a selección que competirá na fase internacional, prevista para finais do verán. Ademais, o alumnado que curse 2º de Bacharelato poderá optar tamén ás bolsas que as universidades galegas conceden para as persoas premiadas nas diferentes olimpíadas científicas.