Vicerreitoría e Concellería de Promoción Económica organizan unha ruta ornitolóxica
Nova oportunidade para iniciarse na observación de aves
Con inscrición gratuíta, terá lugar este sábado 15
No marco dun convenio de colaboración entre a Universidade de Vigo e o Concello de Pontevedra, a Vicerreitoría do campus e a Concellería de Promoción Económica e Universidades impulsaron o pasado mes de decembro unhas rutas ornitolóxicas polas zonas húmidas do Grove, dirixidas a iniciar tanto á comunidade universitaria como á cidadanía na observación de aves. Despois de que a climatoloxía impedise levar a cabo unha das dúas saídas previstas, esta levarase finalmente a cabo este sábado 15 de xaneiro, xornada na que as persoas interesadas poderán participar un percorrido guiado polo que é “probablemente o mellor espazo de Galicia para observar aves de zonas húmidas”, como sinala o director do Green Campus e Campus Crea, Carlos Souto. Con inscrición gratuíta a través do correo electrónico oma.po@uvigo.es, trátase dunha actividade aberta a calquera persoa interesada ata cubrir as 50 prazas dispoñibles.
Con saída da marquesiña situada fronte á Facultade de Ciencias Sociais e da Comunicación, a actividade desenvolverase entre as 9.30 e as 13.30 horas e comprenderá un percorrido por diferentes puntos de observación do complexo intermareal Umia-O Grove, desde os que poder avistar aves como cullereiros, garzas reais, mazaricos ou biluricos. A actividade que na súa primeira edición cubriu as súas 50 prazas, completarase cunha visita ao Centro de Interpretación da Natureza do Grove e insírese nas iniciativas de educación ambiental do programa Green Campus. Desde a organización porán a disposición dos asistentes telescopios e prismáticos, aínda que, como apunta Souto, “é recomendable que quen teña prismáticos, léveos tamén, así como roupa cómoda e de abrigo e algo de comida e bebida”.