Nove tripulacións mediron as súas forzas no Campionato Galego Universitario de Vela 

Nove tripulacións, integradas por 35 estudantes das tres universidades galegas, tomaron parte no IV Campionato Galego Universitario de Vela, no que a vitoria foi para unha das cinco embarcacións coas que a Universidade da Coruña (UDC) concorría a esta competición, na que acadou tamén o primeiro posto no cómputo global por universidades. A Área de Benestar, Saúde e Deporte da UVigo e a Real Federación Galega de Vela foron os organizadores desta competición, que tivo lugar ao longo da xornada do xoves en Vilagarcía de Arousa. Nela, a institución viguesa estivo representada por tres tripulacións, mentres que a Universidade de Santiago de Compostela (USC) contou cun único equipo.

Aberto á participación de estudantes que fosen tamén regatistas federados, o campionato tivo como sede o Centro Galego de Vela e desenvolveuse con barcos Elliot de 6 metros e tripulacións mixtas. Na final, alzouse coa vitoria unha das embarcacións que representaba á UDC, integrada por Marta Torres, Fernando Núñez, Hannah Sofía Carregui e Jaime Herrero. A medalla de prata foi para a única tripulación da USC, completando o podio outro dos barcos tripulados por estudantes da Coruña. En cuarto lugar rematou a tripulación integrada polos estudantes da UVigo Nicolás Domínguez, Emma Arana e Sergio Golpe.

No computo global por universidades, a UDC rematou en primeiro posto, seguida pola USC. No terceiro lugar situouse a UVigo, que estivo tamén representada por outros dous equipos, un conformado por Irene María Martínez-Almeida, Pablo Vieites e Rafael María Martínez-Almeida e a outro composto por Nuno Meijide, Javier Rasilla, Rosalía García e Carla López. 

As instalacións do Centro Galego de Vela acolleron tamén o acto de entrega de premios, no que participaron a vicerreitora do campus de Pontevedra, Eva María Lantarón; a vicerreitora de Cultura, Divulgación e Deporte da UDC, Cristina Naya; o adxunto ao reitor da USC Javier Rico, e o presidente da Federación Galega de Vela, Manuel Villaverde.

Os CGU continúan en marzo

A competición celebrada este xoves constituía a segunda cita da 27 edición dos Campionatos Galegos Universitarios (CGU), que botaron a andar este martes no campus de Ourense coa competición de natación. Coa participación de 600 alumnos e alumnas das tres universidades e o patrocinio, por primeira vez, da Secretaría Xeral para o Deporte da Xunta de Galicia, os CGU retomarán a súa actividade os días 12 e 13 de marzo na Coruña, onde terán lugar as competicións de deportes colectivos, que abranguen fútbol, fútbol sala, rugby, baloncesto, voleibol e balonmán. Finalmente, o 25 de marzo terá lugar o campionato de orientación, organizado pola USC.