Ofrecido polo Grupo EQ2 da Facultade de Ciencias
Un obradoiro afonda no uso de tecnoloxías sostibles para extraer compostos bioactivos
Céntrase no tratamento de biomasa de orixe agro-alimentario, forestal ou mariño
Entre as novidades da programación de obradoiros de extensión universitaria que organiza este cuadrimestre a Vicerreitoría do Campus de Ourense con financiamento da Deputación Provincial, está o taller Bio4. Biosostibilidade na obtención de biomoléculas en biorrefinería de biomasa. O seu obxectivo é achegar dun xeito práctico ás e aos participantes diferentes tecnoloxías avanzadas de extracción de compostos bioactivos, amosando as vantaxes respecto aos métodos convencionais usando solventes orgánicos.
A iniciativa está coordinada polo persoal docente e investigador da Facultade de Ciencias María Dolores Torres, Noelia Flórez e Andrés Moure, do Grupo EQ2 Biomasa e Desenvolvemento Sostible da UVigo, co apoio da coordinadora deste grupo, a catedrática Herminia Domínguez. A temática do obradoiro, explican desde a súa organización, “céntrase no uso de tecnoloxías respectuosas co medio ambiente para o tratamento de biomasa de orixe agro-alimentario, forestal ou mariño, dun xeito sostible, empregando auga como único axente extractor e seguindo os conceptos de biorrefinería e economía circular”. As fraccións bioactivas recuperadas son analizadas mediante métodos in vitro de caracterización de antioxidantes.
O obradoiro está pensado para dar “una visión xeral do potencial destas tecnoloxías”, para o que conta con 30 horas distribuídas en sete sesións que se desenvolven desde o 25 de febreiro e ata o 8 de abril en modalidade mixta, tanto presencial como virtual. Nel están inscritas dez persoas, estudantes de mestrado e doutoramento con formación en Enxeñaría Química, Ciencias do Mar, Biotecnoloxía e Enxeñaría Agroalimentaria. A iniciativa, indican as e os seus responsables, enmárcase “dentro da liña principal de investigación do Grupo EQ2, que se basea no aproveitamento de residuos de biomasa vexetal para a obtención de produtos de interese na industria alimentaria, farmacéutica, etc., integrando aspectos de enxeñaría química, química ou ciencia de materiais”.
Teoría e práctica
As dúas primeiras sesións estiveron centradas no potencial da biorrefinería de diferentes tipos de biomasa, para continuar abordando a aplicación en compostos alimentarios e cosméticos. As seguintes sesións centraranse na aplicación práctica de cada unha das novidosas tecnoloxías de estudo, para ver in situ o seu funcionamento. Concretamente, o programa contempla a abordaxe das biorrefinería, do escalamento de procesos para o procesado de biomasa en termos de biorrefinería, da extracción de biomoléculas, dos péptidos bioactivos en alimentos e da aplicación de compostos en cosméticos. As prácticas en laboratorio abordan as técnicas de extracción convencional, por ultrasóns, por autohidrólise e por microondas e a comparativa entres estas diferentes tecnoloxías, ademais da análise de compostos bioactivos.
“As tecnoloxías de extracción propostas neste obradoiro, nas que o noso grupo de investigación ten unha ampla experiencia, permiten un aforro de tempo, recursos e enerxía respecto aos métodos convencionais onde longos procedementos coa utilización de disolventes orgánicos son empregados”, comentan as e os responsables da iniciativa. Para abordar estes temas, a actividade conta coa participación de docentes de ámbito estatal (Universidade de Jaén e Universidade de Vigo) e internacional (Universidade Auckland e Universidade de Coauhila).