O curso está promovido pola Área de Innovación Educativa
Os docentes aprenden como empregar as novas ferramentas web 2.0 para o ensino
A Vicerreitoría de Formación e Innovación Educativa, a través da súa Área de Innovación comezou no campus o curso Aplicacións Educativas da web 2.0 dentro das accións formativas institucionais para este ano 2008. Ao longo das 20 horas de clases teórico prácticas o profesor da Escola Superior de Enxeñaría Informática e encargado de impartir o curso, Pedro Cuesta, achegará ao persoal docente da Universidade as novas ferramentas para crear e compartir contidos en Internet de xeito sinxelo e como aplicalo ao ensino para unha aprendizaxe cooperativa. As solicitudes superaron con creces a previsión e as 20 prazas ofertadas cubríronse na primeira semana de prazo.
A web 2.0
O obxectivo é dar a coñecer aos profesores “o novo mundo da web 2.0, a gran descoñecida. É unha nova versión da web con ferramentas de nova xeración gratuítas e accesibles a calquera usuario como youtube, wiki ou os blogs” explicou Cuesta.Concretamente, no curso preténdese un acercamento a estes instrumentos dende a perspectiva da educación e como se poden introducir na Universidade e aplicarse ao ensino para mellorar a docencia ou a investigación. “Os marcadores sociais ou agregadores, por exemplo, son moi útiles para subscribirse a varias fontes e lelas á vez dende calquera canal” comentou Cuesta, “ou as wikis, que son páxinas como a Wikipedia editadas de xeito cooperativo. Estes son os eixos fundamentais ao redor dos que xira o curso, pero o gran protagonista é o blog”, engadiu. A través destas páxinas calquera pode publicar contidos de xeito fácil polo que teñen moitas posibilidades no eido educativo. “Queremos que os profesores se introduzan nese mundo e se animen a crear edublogs. Temos un grande exemplo en Daní Martí, que se converteu co seu, Comunisfera, nun referente en España” explicou.